وقفت قبايل لك من ارض الجزيره
______________وقفت غيور وشهم ومحب للخير
استنفرت كل العرب مستجيره
______________في حالة استعداد وتأهب وسير
تحزمو بسلاح باس وذخيره
______________ماهو بسلاح الحرب تسليحهم غير
سلاحهم قوة تماسك وغيره
______________من خوف يا سليمان لا راسك يطير
وتصير صدمه فالضماير وحيره
______________يترك اثرها جرح دكتوره يحير
دمك علينا حق واجب نجيره
______________دونه عرب هبت هبوب المعاصير
السيف يبقى في خباه وجفيره
______________والمال في دبرة ولي التدابير
تماسكو من كل صوب ٍ وديره
______________رجال شيمه ما تحسب المخاسير
قبابل ٍ تاقف بوجه المغيره
______________اهل النخاوي والعزاوي مناعير
وقفو سترهم ربنا بالستيره
______________وما باقي الا نخوة وفزعة مطير
ومطير شم النايفات العسيره
______________رواسي ٍ وارسى من طويق والنير
لا كبرت القاله عليهم صغيره
______________يا خفها واخف من ريشة الطير
فزعاتهم نور العيون الضريره
______________وقفاتهم تنطح جموع وطوابير
والثارطلابه تراجع ضميره
______________طلب كريم يصّير الشي ويصير
واثّرعلى من خصه الامر غيِره
______________عن القصاص تنازلو عقب تأثير
بيضان سيرتهم علت كم سيره
______________معطره تحمل كرامه وتقدير
نطلب لهم علام ما بالسريره
______________بالصبر والسلوان ويعيضهم خير
حتى مع جاهة شيوخ العشيره
______________ما صار بستقبالهم أي تقصير
وبالرغم يالمطران الاديه كبيره
______________زاحت هموم ٍمشغلتنا وتفكير
قد ساهمو فيها اعداد ٍ كثيره
______________من كم دوله ما اخضعت للمعاذير
ووصلت من الخارج حشود ٍ غفيره
______________بمساعدات ولا اتعبتها المشاوير
حتى الذي ما يملكون الشعيره
______________هبو مع النخوه لجمع الدنانير
مساهمات نفوس ناس ٍ قديره
______________بجمل صورها تقدمت والتعابير
وجهود يااصحاب النظر والبصيره
______________تبذل وجم البير لساع بالبير
مبلغ كبير بظرف مده قصيره
______________كنا نجمع به من الصبح لعصير
حان الوعد والمال ما جاء بشيره
______________والموعد الاول حصل فيه تغيير
ما قصرون اهل الوجيه السفيره
______________تأجل الموعد لموعد بتأخير
نخشى الزمان يفوت والوقت عِيره
______________والمبلغ من المحكمه فيه تقرير
ان ما مااكتمل صارت علينا كسيره
______________والحكم ما يُنفى ولا فيه تزوير
ويواجه سليمان ساعة مصيره
______________والمشهد اللي ما نبي كلنا يصبر
واحمد صغير السن واخته غريره
______________والموقف الغصاب يحتاج تبرير
فرحتهم ان شِيلت بصدمه خطيره
______________ متاملين طلوع ابوهم على خير
تكفون يا نور العيون الضريره
______________تكفون لا ينقص يا عزوة مطير
لا كبرت القاله عليكم صغيره
______________يا خفها واخف من ريشة الطير
_تكفون لا ينقص يا عزوة مطير .
العرض المتطور
