قصة حويط 12 تموت من الضحك
حويط 12 من الشيبان البسطاء اللي قلوبهم نظيفه وخضرا، يملك كم بيت طين ومزيرعه صغيره يخسر عليها اكثر مما يربح .
حدته الدنيا في يوم من الايام واضطر انه يعرض المزرعه للبيع .
جلست المزرعه مده معروضه للبيع ولا جاء احد يشتريها او على الاقل يسومها .
حويط 12 له جار طيب يقال له ابوصالح، وهو صديقه القديم قبل ان يكون جاره .
قرر حويط 12 يبيع المزرعه على صديقه وجاره ويلصقه بظهره خصوصا وانها ماتجيب قيمه .
حاول بشتى الوسائل يقنع ابوصالح بالسعر وانه هو الكسبان لكنه فشل .
مره يغريه بمواصفاتها لكن ابوصالح معنّد على السعر ومتكيثره ..
ومره يقول انه مضطر يبيعها اضطرار ولا هوب لاقي احسن من ابوصالح شرّاي وتناسب له .
اخيراً وبعد محاولات ومداولات وافق ابوصالح انه يشتري المزرعه بسعر مناسب للطرفين .
تواعدو إنهم يروحون للمحكمه علشان الافراغ وياخذون ابوعلي وابوسالم شهود على البيعه .
قام حويط 12 من الفجرمثل عادته وتقهوى ثم افطر وعين من الله خير، ثم طلع وشغل العراوي علشان يروح للموعد .
ركب الددسن ودق سلف .. عيّا يشتغل الموتر!!! دق ثاني مره ونفس الشيء .. ثالثه ورابعه ماش عيا يشتغل الماخوذ .. فتح الكبوت وتفقد اصابع البطاريه واسلاك البواجي ولمس راس المكينه ثم فتح علبة ماء المساحات ( وهذي ما ادري وشوله فتحها ) .
تفقد المكينه كله ولا لقى شيء متعطل .. رجع للغماره وسمى بالله وقرأ آية الكرسي والمعوذات ثلاث مرات قال يمكن ابوصالح صاقعن الموتر بعين لانه امس يوم يشوفه قال ( الى هالحين معك هالموتر اللي كنه رمسيس الثاني؟؟!! ) [ مدري وش عرف هالشايب بتاريخ الفراعنه؟!! ]
اكيد انه راعي خنبقه وسفريات وبربسه منول .
عقب ما قرأ آية الكرسي والمعوذات داس حويط 12الابنص دوستين متتاليتين قبل يشغل .. دق السلف لكنه يدق ويطفا .. قعد يفكر ويقول : العين ماتجي الا من خوي ورفيق
احتار في الامر ثم قال : مالي ( مهوب نيجيريا ) الا موتر ولدي شعطوط الكامري ..
الله يهدي هالولد كل يوم يدخّل الموتر بالبايكه ولا يمكن يخليه برا البيت ابد!!
كان عذر شعطوط بتدخيل سيارته يتعلث بانه لو خلاه بالشارع يمكن تنسرق مثل سيارة خالد ولد جارهم، لان سرقة الكامريات كانت منتشره بكثره وقتها .
هذا عذر شعطوط .. لكن الحقيقه والصدز انه من حقين التفحيط والمشهورين فيه وكان لقبه بين الشباب المنطعج .
ومافيه شارع من شوارع المملكه الا ومتره تمتير فلذلك كان يدخل الكامري بعد كل جرية تفحيط علشان ماينكشف امره ويمسك .
نرجع لحبيبنا حويط12 ..
رجع حويط12 للبيت وقرر انه يأخذ الكامري علشان مايتاخر على موعده مع ابوصالح .
دخل للبيت وقعد يصوّت لام شعطوط .. ياهيش وينتس فيه؟؟
جت ام شعطوط مسرعه تحسب فيه شيء ثم قالت بكل حنيّه ورقه : اخويتنا على هالصبح!!
وش تبي؟!!
رد عليه بكل لطف ورمانسيه : آها بس .. ارقي لحجرة شعطوط وجيبي مفتاح موتره من مخباته .
قالت : صحيح انك عله وقلق [ طبعاً قالتهن بينها وبين نفسها لانها عارفه ان حويط12 خريج معهد تيكوندو ومعه حزام بطولة البلياردوا العالميه وخايفه يفقع وجهه ] .
رقت لحجرة ولدها المنطعج واخذت المفاتيح من ثوبه المعلق وهو يشاخر وبسابع نومه .
جابت المفاتيح ومدتهن لحويط12 وقالت بكل عذوبه مع تسبيله بالعيون : دوك يالشين .. [ ولو الفاظ ام شع طوطالفاظ عرابجه ما الومه مادام لقب ولده المنطعج ]
تلّ حويط12 المفاتيح من الزوجه المصونه وهو مطيّر عيونه وحمقان على هالولد اللي يسهر بالليل وخيشة نوم بالنهار .
فتح باب البايكه وهو يتمتم ويقول : الله يغثك من ولد تسان غثيتن وبغثرت تسبدي .. كل شوي مدخل السياره ومطلعه .. خرّب الفصّالات حقت الباب [ هذا اكبر همه ]
ركب الكامري وبسم الله دق السلف ومع اول نقره اشتغل الموتر وفي نفس الوقت لعلع صوت المسجل باغنية بشير المشهوره ( تري ريري ريتا .. متى يجي بابا ... )
فز حويط12 ومن الروعه يبي يطفي المسجل شغل المساحات ثم دق الاشارات لين طاحت إيده على ضغاط المسجل وطفاه .
قلب الضعيف دق مليون عقب هالموقف .. وقام يتلفت يحسب احد مر بالشارع وشافه بهالوضع .
طلع الموتر من البيت ودز لبيت ابوصالح يوم وصله عطاه تشكيلة بواري يحبهن قلبك كانوا متعارفين عليها من ايام المتوسطه [ راعين تكاسي شفرات على غفله ] .
طلع ابوصالح يسحب رجليه وهو يقول : وينك يالزلابه؟!! وراك تاخرت؟!! [ من زود الميانه ]
رد حويط12 : اركب بس ولا يكثر انت وراسك اللي كنه كتاوت ماركتو ( تشبيهات اولين .. عيال النيدو يمتنعون )
وهواء على بيوت الشاهدين ابوسالم وابوعلي .
عقب ما اجتمعوا اربعتهم في الكامري ( حويط12 وابوصالح وابوسالم وابوعلي ) قال السواق حويط12: ماتبون نمر الحله وندق كبده؟
قال ابوصالح : اخاف نصيّف على المحكمه .
رد ابوعلي من المرتبه اللي وراء وكان مجعّص : أنا والله ضاربن لي مريصيعات وشبعان .
اما ابوسالم فدابه سليمه لايهش ولا ينش، معهم معهم عليهم عليهم مغير هاجن اثمه وفاتحن الدريشه يتفرج على الناس والسيارات .
اتفقوا انهم اذا خلصوا من المحكمه بدري يروحون يفطرون كبده .
ربطوا الاحزمه واقلعو متجهين للمحكمه، تعرفون سواقة الشيبان الله بالخير، يعني اذا بغى يكيّم بالطلبون يمشي ستين .
عند احد الاشارات ديور والموتر يلقلق بالثالث، كان بالاشاره المقابله لهم راعي دورية لومينا، قز الكامري وكان عنده تعميم عنها، وطوالي شغل السفتي وقطع الاشاره وراهم ولحمّ صدام الدوريه اللومينا الامامي بصدام الكامري الخلفي وهو مشغل السفتي .
حويط12 على نياته ولا يدري عن اللي صاير وراه لانه مايعترف بشيء اسمه مرايه خلفيه فلذلك مادراى براعي الدوريه .
طلع راعي الدوريه صوت ( وييييييييي ) يبيهم يوقفون وهم مهوب لمه .. تكلم بالجهاز وقال : على جنب ياراعي الكامري . . ولاجابوا خبره .
حويط12 كان يسولف مع ابوصالح عن المزرعه ونوع طرمبة الماء اللي فيها وعدد النخل، ويكرر بانه هو الربحان من البيعه .
اما الثنين اللي وراء فواحد يتفرج على الناس والسيارات وطايرتن عيونه بالخلق، والثاني اخذن له غفوه .
تأكد راعي الدوريه بان الكامري هي المطلوبه عنده بالتعميم وقال أكيد مادامه ماوقف فانه يبي يحاول الهروب .
كلّم العمليات وطلب فرق تعزيز وعلمهم بموقعه .
صدفه كان بنفس الشارع وايت ماء سقط عليه حويط12 وعقب ماتعداه زعق ابوصالح وقال لف يمين تراك تعديت الملف، ومير يجدع الموتر حويط12 وشوي ويدخلون تحت الوايت لكن فكهم الله ( تعرفون سواقة الشيبان يجدع الموتر بدون مايناظر ) .. طبعا راعي الدوريه ما امداه يدخل وراهم وحال بينه وبينهم الوايت، ويكع فرامل ويرجع ريوس لنفس الشارع ويلحقهم .
شافهم من بعيد وداس وراهم، وهو يمشي وراهم يشوف روؤسهم من وراء ويقول لخويه الجندي : أكيد هذولا مبزره مفاختين من المدرسه ومزعجين العالم بالتفحيط [ تخبرون الشيبان مايلبسون عقل وجادعين الشمغ فوق روؤسهم جدع ]
دخل حويط12 احد الشوارع ولقى دوريتين مسكرات الشارع علشان يحجرونهم ..
يوم اقبل على الدوريه قال : اربطوا احزمتكم وطلعوا اثباتاتكم ترانا مقبلين على تفتيش [ الله من زين الشوف ]
وقف واحد من العسكر بوسط الشارع قدام الكامري ومد ايده يعني وقفوا .
قال المنجعص اللي وراء ابوعلي : مهوب تفتيش .. هذا واحدن يشحذ [ الله من زين الامور ]
رد حويط12 : يارجال انثبر بس انت وعيونك .
عقب ماوقفو .. جاء العسكري عند باب السواق ووش يشوف!!!
شيبان ؟؟؟؟؟؟!!!!!!! [ هذي هي الكلمه الي كانت تتردد بذهن العسكري ]
فتح الدريشه حويط12 وقال : السلام عليكم .. وما امداه يكمل الا والثنين اللي كانوا يطردونهم بالدوريه جايين يركضون وبحركه سريعه فتح واحدن منهم باب السواق وجرّ حويط12 مع ايده .. ونفس الشيء صار لابوصالح مع العسكري الثاني .
هالشيبان الضعوف ماعاقوا معهم وطارت شمغهم وانحاست امورهم .
انبهروا العسكر من الموقف وتفشلوا يوم اكتشفو انهم شيبان وانهم تسرعوا ومدوا ايديهم عليهم .
عقب ماهدأ الوضع واستتبت الامور وتبين كل شيء وتلافياً للاحراجات اللي صارت قام واحد من العسكر الكوماندوز وحبّ راس حويط12 وتعذر منه واستسمح .
رد حويط12 وقال : مهيب مشكله حوسة الشمغ وتقطيع ازرة الثياب .. المشكله من يرجع سمعتي اللي شوهتوها قدام الناس؟!!!
متجمعين علينا بدورياتكم تسننا حنا المفجرين بعماير بوش؟!! [ متابع السي ان ان ]
فتش العسكر الموتر ولقوا بالدرج حبوب بيض!!
جابهن الضابط حويط12 وقال : وشن ذولي؟!!
اخذهن حويط12 وقعد يتمقل بهن شوي ثم قال : انا تسد وصيت ولدي شعطوط يجيب لاميمته فنادول ( بنادول ) لانها صاكها راسها ..
بحدا الايام الفايته جاها خبر عن اختٍ لها بدومة الجندل عليه قل صح ومير يضيق صدر الضعيّفه وتعاف الطعام يومين والظاهر مع كثر الاغراض نسى ينزلهن .
قال الضابط : هذولي ياخال حبوب بيض .
رد حويط12 : ايه اشوف انهن بيض .. هذولي الله يسلمك مثل ماقلت لك ، ام شعطوط صكها راسها بالفايت عقب ماسمعت ان ....
قاطعه الضابط : هذولي الله يغفر لك مخدرات .
تغير وجه حويط12 وامتع لونه <<=== هذي دخلت عرض وقال : وش جابهن بموترنا؟!!
قال الضابط : اسال ولدك شعطوط يمكن يكونن له .
قال حويط12 : ايا الهيس الاربد .. منيب لمك ياطويل العمر انا اعني ولدي شعطوط .
زاد كل مادخل البيت واثر خشته تثعور من الريحه الشينه ( يحسب الحبوب لهن ريحه مثل الخمر ) .
.. صحيح اللي اختشو ماتو .
رد الضابط : المهم يابه العمده الموتر نبي نسحبه بالونش والولد لازم يحضّر عندنا بالقسم .
حويط12 : ولا يهمك اجيبه لكم باذنه بس الموتر ودي ماتاخذونه معكم لانه باسم اخته لطيفه، مقسطينه باسمها من الراجحي لمدة خمس اسنين، الله يصلحها تشتغل مدرسه بالمتوسطه الثالثه و ....
قاطعه الضابط : انت جب الولد ولايصير الا كل خير .
كل هالحوار اللي دار بين الضابط وحويط12 بينما باقي شلة الشيبان قاعدين بظلال حدا الجدران عن الشمس .
وقف العسكري لموزين وركبوهم فيه .
اثناء تحرك اللموزين القى حويط12 نظره على الكامري والونش يسحبها ولسان حاله يقول :
فات موعد المحكمه وطارت بيعة المزرعه
تقبل تحياتي ياجدوووو
قصة حويط الثاني عشرر هههههههه
رد: قصة حويط الثاني عشرر هههههههه
العرض المتطور
