الطيب كايد والردى يجلب الضيق
والمجد قمة والمهاوي نذاله
طويق لو يشره على قمة طويق
كان الردي يبكي على راس ماله
يصفق على يديه من يبلع الريق
اليا لفاه الضيف كفت دلاله
ردي جد لفعلة الطيب مايطيق
وعند الحليله قام يعرض فعاله
متربق(ن) في ربق منساق في سيق
يبخل على نفسه وعيشة عياله
هذاك حطه من حساب المصافيق
ولا تجنب جيته مع سؤاله
وما يضيع فعل الطيب عند المطاليق
اللي يقيدون الجمل في عقاله
بيمانهم تلقا كبار المواثيق
مثل الطناب اللي قويه حباله
إفهام ماودهم دروس وتحاقيق
إكرام وقت الطيب لا جا مجاله
طيور شلوى معتلين الشواهيق
ارداهم اللي لا بغى الحق قاله
ذخر الرجال وطيبهم في صناديق
من يفتحه يقوم سعده وفاله
وان كان صكت في وجيه المخاليق
تلقالهم في كل الاحوال حاله
ادلال بيض(ن) كنهن الغرانيق
وفنجال يشفي راس من فيه عاله
وسوالف(ن) تطرب لها الناس وتليق
في مجلس(ن) يرتاح له من عناله
ربع(ن) على النيه ولا هم محاميق
أخفاف النفوس وعايشين بسهاله
اللي يفكون النشب والمغاليق
سهله عليهم مثل شرب البياله
هذي تجي سندا وهذي توافيق
وهذي مع الايام تبقى جماله
ربع(ن) على كسب المعالي مشافيق
في راس عيطا شبحهم للطواله
عز الله انهم عايشين ومرازيق
من جيدهم والمرجله والجزاله
والنهته اللي تمزق الصدر تمزيق
يا كنها بندق وفزعة دخاله
مره الشجر مثمر وطلعه مواريق
ومره هشيم يشب ضوه إلحاله
ومره تهل ويمطرن الزماليق
ومره جهام(ن) ما يقطر خياله
والهرج واجد والاوادم مطافيق
واللي يقول الصدق يرتاح باله
قليل من يصحا على الطيب ويفيق
وكثير من ياخذ طبايع خواله
ومن التجارب خابرين التفاريق
والطيب ما يصعب على اللي سعاله
ترى الحظوظ إتفتح دروب وتعيق
ولاحد(ن) تخيرها على ما بداله
اما تحط الشيخ وسط المطابيق
ولا ترزه لين يرفا خماله
والعمر يقفي والليالي ملاحيق
والرابح اللي صالحات(ن) اعماله
لا صار من حولك رجال(ن) مناعيق
ربع الطمانه والردى والرزاله
إختار ارض(ن) ما تجيها الصعافيق
و دور منازل طيبين الشكاله
لو راس حزم يلاعجنه الصواعيق
آخير من أرض(ن) تضم الحثاله
يرحم زمان الغطرسه والعماليق
ويرحم زمان القبيله والسلاله
حنا بوقت اتضيع فيه المواثيق
كبير في دنيا عيون العماله
تشره على الدنيا عيون العشاشيق
وغيري من العالم زمانه صفاله
كلمه تريح لو تفج المعاليق
أما حياة العلم ولى الجهاله
طويق لو يشره على قمة طويق
العرض المتطور
