اقسم اني للجلد راعي جلد

أبتديها بقل : هو الله أحد
ربنا اللي خالق ٍ عدل وعواج

المحبه كان خالطها حسد
بيعها بالرخُص في سوق الحراج

الردي عندي فلا قام وقعد
والعزيز انحطله ع الراس تاج

ما حسبناها بعيدات الامد
والنوايا كالمرايا والزجاج

ما شرهت الا على وجه السعد
وما كرهت الا رياجيل المزاج

مكثر الصحبه اذا قلنا عدد
تبحل ان عديتها فهود الزراج

الكرامه ما يقدرّها الولد
والرخامه مالها طب وعلاج

والصبر مفتاح لقفول النكد
وعند ربك لا تضايقت الخراج

خلق ربك والحيا كلها كبد
ان شربت العذب يتلاه الهماج

يا تشد البيت بطناب وعمد
يا تقشّعه الذواري والعجاج

اقسم اني للجلد راعي جلد
رغم حزن الليل فليّت الحجاج

دام شبحي فوق مدهال البرَد
ما عليّ أمن الحصاني والدجاج

اشهد انّه ما احد ينفع احد
لو يحمْس الكبد في رمضا وصاج

عزتي للي عقب شبّه هجد
نار شيح ٍ تنطفي والبال ساج

لا ترود مهرتك يم الكدد
دام قدامك وسيعات الفجاج

واختتمها بقل : هو الله احد
ربنا اللي خالق ٍ عدل وعواج

اشهد انك جبتها وفالك سعد
من طناخة راس يسلم هالمزاج

وسيع القصيد

صح لسانك ولاهنت على الابيات الجميله

تحياتي لك