العجوز مدلعة

يا مقدّم حالة الطقس حسـب الإعتقـاد=الفصـول الأربعـه دايـر ٍ دولابـهـا
منطقتنـا والعـه بالفتيلـه والـزنـاد=خل الأجواء مستديره ولا تشقـى بهـا
أحتمت من يوم هبّـت ذعاذيـع البـراد=موجز النشره لفاك وعطـاك حسابهـا
من يقول النار لا بدّ ما تصبـح رمـاد=ما درا وش صار والنار مـن شبابهـا
القضيّه شابت وجابـت علـوم ٍ جـداد=مير يا ستاّر مـن سترهـا وحجابهـا
والمصيبه مجلس الأمن فيه الخوف زاد=مشكله عن حلّهـا عاقديـن أسبابهـا
مابقا ألاّ يعرض الشرق الأوسط للمـزاد=كل دوله فـي حـدوده تطـقّ أبوابهـا
العجوز مدلّعـه والولـد مالـه مـراد=غير يكحلها ويرقـد مابيـن أهدابهـا !
والعرب تمشط لحاها وتنسـاق وتقـاد=والعجم هامت وقامت تمـسّ أشنابهـا
خصّب ( اليورانيوم ) وأنتبه يا أحمد نجاد=لا تخصّبـك البـلاوي ولا تبـلا بـهـا
يا ولد عمّ الخميني .. بناخي شهـرزاد=الجماهيـر الغفيـره كسبـت إعجابهـا
والنوّويـه معـك لإزدهـار الإقتصـاد=لا تروح العولمه مـا لحقـت أركابهـا
المفاعـل يشتغـل والتطّـور بإزديـاد=ذرّة ٍٍ لـو تنفجـر كبـرّت مضرابـهـا
لا تطيّر شرّها .. من بـلاد إليـا بـلاد=عقب نارك وسط دارك قبس مشهابهـا
أنت جار ولا نجيـرك ليـا زاد العنـاد=ملّتك ماهيب سمحه ولا نرضـى بهـا
تدفعك قوم العمايم على خوض الجهـاد=ومستشارك حيّة ٍ سمّهـا فـي نابهـا
يا ولاة الأمر ندخـل علـى رب العبـاد=كلّ من ودّا مصيبه .. صحيبـه جابهـا
الحكومات الرشيـده مفارقهـا الرشـاد=يا الله انـك تستـر المسلمـه بثيابهـا