قصيده وجهت لي من الشاعر / عبد العزيز جميل . جسد فيها معاناته في ليلة عيد الفطر المبارك حيث تذكر ابنه جميل رحمه الله.
الناس قادو ليلة العيد شمعات
وانا الوحيد اللي مطفي شموعي
والعيد عيد افراحنا والمسرات
وانا نهار العيد اكفف دموعي
تجري على الخدين والطرف ما بات
غصب ٍ عليه تسيل ماهي بطوعي
كني صويب بطعنه وخمس طعنات
من خنجر ٍ مسموم بين الضلوعي
حي ٍ وكني ميت ٍ بين الاموات
وافز من نومي وانا في هجوعي
والله ياابوبجاد جميل لو مات
ما انساه كود انسى السجود وركوعي
في يوم موت ابوي عشت المعاناة
واليوم ثاني مات يا كبر روعي
يا رب سكنهم برحمتك جنات
اطلبك واتوسل بساعة خشوعي
يا رب والهمني الصبر فالملمات
عبدك وابن عبدك ومعلن خضوعي
صلو على المبعوث للناس رحمات
اعداد من حجو لمكه جموعي
ردي /
رسالتك فكت كثير الملفات
عندي وانا من ضيقهنّ جزوعي
منها الخفوق اهتزواستنفرالذات
والجاش فر وزاد همي ولوعي
وانا من اول شايل الهم بسكات
اكض في نفسي وقفل سموعي
ابا اتناسى الحزن لو بعض الاوقات
شهرين والا شهروالا سبوعي
وتفتحت حتى قديم السجلات
وبطيهن ناسي ضمايا وجوعي
رسالتك ماهي مجرد عبارات
وابيات شعر من اي شعر ٍ ونوعي
طياتها تحمل مواجيع وآهات
ودموع تذرفها نزول وطلوعي
وتجرها برداف ونه بونات
عيد الفطر ليله ويوم الربوعي
والعيد له بوجيه الامه علامات
يشرح صدوران سلمت من الفجوعي
والفرّح له بهجه وللحزن حسرات
نيرانها ما تاكل من المتوعي
هذي توقّد في لزوم ٍ وكشتات
ومن الشجر تاكل هشيم وفروعي
والا انت نارك نار حسرة فلذات
جميل من كبدك فلذة نزوعي
نسياه صعب وفقده من الصعيبات
ذكراه معك ومع هله والربوعي
ادعاك ما عايدت بعض الجماعات
وانته رجل توصل ولا انت بقطوعي
وشلون الومك وانت بفكارك اشتات
تمسي وتصبج بالالم والوجوعي
ياابوشهيربكل وقفه وفزعات
اطلب وتلقاني وتعرف طبوعي
انا الخوي وآقف بكل المجالات
الليل لجلك لمرحه فوق كوعي
في صعبة ٍ اوعسره من العسيرات
برجال والا مال والا دروعي
الا بهذي سابع المستحيلات
بيدين محيي عظامنا والزروعي
اختاره الرحمن رب السموات
واطلب له الرحمه نهارالرجوعي
معاناة الشاعر/ عبدالعزيز جميل في ليلة العيد وردي .
العرض المتطور
