البارحه توه لفانـي طـرف علـم
من خاملين الذكـر علـم وكـادي
وحلت بهاجوسـي بيـوتٍ تداحـم
استرسلـت بالمفـردات الجـدادي
من كثر مانسمع من الشتـم والـذم
لجرح المشاعر من خلايا الفسـادي
جهـال وامييـن واذانهـم صــم
مامن عقـول ولاش رايٍ سـدادي
اوباش البشــر قامـت تناغـم
بعيونهـا قامـت تـذر الرمـادي
الكذب والتزويـر طبـع الغشمشـم
وزاد الهوس فيهـم وزاد التمـادي
ذا يقدح ويمـدح والاخـر تهجـم
باخبار مغلوطـه ودون استنـادي
للبايهـات وللسـواقـط تشمـشـم
لاثـارة الفتنـه وقتـدح الزنـادي
مندسه وسط العسـل دسـت السـم
وشاع الخبر مابين حضر وبـوادي
خيم عليهـا الجهـل والحقـد خيـم
تعرضـت للنـقـد والانتـقـادي
ياليت بعض الناس يصمت وينطـم
اخير له من سرد بعـض الـدوادي
يحبس لسانه فـي فمـه ويتدمـدم
قبـل يتعـرض للنكـد والنكـادي
القزم لاخطاءالـدرب لازم يقـزًم
وتقلـم اظفـار الهبيـل الربـادي
ياللـي يتحلـم بالعـلا لاتحـلـم
ارجع لدرب الحق وين انت غـادي
انته تعيـش بوسـط جيـل مكمـم
من ينجرف مع ركبهم ماستفـادي
رويبضـات الجيـل قامـت تكلـم
باسمـاء حركيـه لبـث الفسـادي
مهنة بعضهم نتب الاجـواد والـذم
بالظلم والبهتـان لاهـل الشـدادي
حل الحسد والحقـد والهـم والغـم
وبانفوسهم دب المرض بازديـادي
وجسر التواصـل والمـوده تهـدم
وبان انهيار الجـدر والارتـدادي
انصحـك يامـن للمشاكـل تقـدم
لاتعترض للحـذف يابـو عبـادي
وسوس لك الشيطان والخافي اعظم
ماينقنص بك فـي ليـال الهـدادي
احذر مـن اللـي لقنـك لاتوهـم
تصبح عشى لموقعـات الحنـادي
بعض الربوع استهجنـك ويتهكـم
ينظر لك بنظرات فيهـا انتقـادي
خدعك من غواك والبـادي اظلـم
ويحاسبـك ربـك نهـار التنـادي
امعلمـك دهـورك بئـس المعلـم
وظليت وحدك منزوي وانفـرادي
اكـل مـن النعمـه وفـل وتنعـم
مالك ومـال مروجيـن الـدوادي
تراجـع وخلـك فهيـم وتفـهـم
وانهل من اهل المعرفه والرشـادي
باكـر تناولـك السنتهـم وتـنـدم
وتلطم خـدودك بينهـم بالايـادي
ينشب لسانك في جمـاك وتحطـم
ويغشاك من عار الملامه سـوادي
خوذ النصيحه يالمهرج وقـل تـم
قبل العواصف تنهبـك والغـوادي
لو تعترض للمعضـلات وتحـزم
ماانت متعشي من عمود الجـرادي
مالك جناح وريش يالطير ابو فـم
وحدك تقوقي مثل طيـر الحمـادي
مانتـه علـى ذم الاجاويـد ملـزم
ياطير ابن برمان ضايـع وغـادي
خل الحمايـل مانـت بالهـا مقيـم
كلامك اجوف ماعليهـا اعتمـادي
جنب عن الهفـوات ياغافـل ونـم
خف من جليل الملك رب العبـادي
وان كان في راسك حماقـة تولـم
يلطمـك ممـرورٍ بنفسـه مفـادي
وضح لنا اسمـك لاتـروغ وتلثـم
مع زمرة الخبث واهـل العنـادي
مايندمل جرحك من القيـح والـدم
لو عالجوه وسارعـوا بالضمـادي
صل الفروض الخمس ياغافل وصم
وعثرة لسانـك جرتـك للبيـادي
بالمجتمـع مثـل البهيـم المبـلـم
تومي براسك مثل ثـور البـلادي
الكذب عيـب وبالشريعـه محـرم
بحديث من هو للملا خيـر هـادي
وبعض الجماعه صار بالكذب مغرم
هو ديدنه في كـل نـدوه ونـادي
غدوبه اللـي مالهـم عهـد واذمـم
وقـاده قرينـه للخطـا والنفـادي
مسمـوم تفكيـره وعقلـه مسمـم
والكذب في معلومته شـي عـادي
الحقد في وجهك لـو انـك تبسـم
ومن كاد خلـق الله لابـده يكـادي
تعيـش بانفـاق الظـلام وتكـتـم
بئس الطبيعـه والطبـع والمبـادي
لاتنجرف مع ركب معتوهـا ابكـم
عليك تـرك اريـاه والابتعـادي
من كثر ظلمك عان وجهك تجهـم
ابعد عن الشلـه وخلـك احيـادي
سوء الفهم خانـك وخـان المعلـم
ولا به جمل ضره دبيب القـرادي
مسيلمـه رمـاك فـي غبـة اليـم
وابو رغال افرح عليـك الاعـادي
بالهون يابو الهول زيـن المحـزم
وقعت فـي محبالـة الاصطيـادي
سرابـك الجاثـوم بالليـل الاظلـم
بعد امتطـاك وطعـت للانقيـادي
في بحرٍ امواجه تخيـف وتلاطـم
نسفـك موجـه ياكبيـر الثنـادي
ليتك عصيت لمرشدك قبـل تنظـم
لاصوات مشبوهه تحـب النكـادي
ماخص احد باسمه ولا اريد اعمـم
واستذيب الحصني وراع الغمـادي
لـو انهـا تفقـه وتنسـى وتلتـم
وتدفن حدث ماصار تحت الرمادي
الامر واضح مايبـي لـه مترجـم
في كل حـي وكـل حلـه ونـادي
عقب الرجال اللي لهم دور واشيـم
اهل الرماح ومسرجـات الجيـادي
تردا الخطر باظهور جيشٍ عرمرم
برماحهـم ومصقـلات الهنـادي
لاقامت جمـوع المعـادي تزاحـم
عاداتهم قمـع الحريـب المعـادي
دون المعقـل والحلـل والمخـيـم
ودون السواد ومقرعـات التـوادي
فرسانهـم سقـم العـدو لاتـقـدم
لاثارت الهيجاء وسـاح الطـرادي
منقول
يا اهل الكذب و التزوير و الاشاعة
العرض العادي
