خلوني اكرم فـي حياتـي وانـا حـي (قصيدة وقصة )
أسعد الله أوقاتكم بكل خير
هذه القصة حدثت لشخص يقال له (مبارك البخيّت) وأصله عبد ... وكلنا عبيد لله .. من عبيد قبيلة سبيع.
يقول البخيت انه في سنة 1395هـ كان عسكري في الحرس الوطني في منطقة منطقة تسمى (أم السلم) وكان يسكن في منطقة بين مكة وجدة تسمى (بحره) وبحره هذي كان فيها معكسرات للحرس الوطني .. يسمونها (الأفواج) وكان العاملين في الافواج هذي يجون كل شهر يستلمون رواتبهم ..
وأيضا اصحاب الناقلات اللي يكدون .. ويروحون مشاوير للحجاز .. من مناطق رنيه والخرمه وديار سبيع يمرون على البخيت في بيته ويجلسون عنده بحكم إن مافيه أحد متأهل في المنطقة الا هو، وهو كان رجال كريم ولا يجيه أحد الا يغديه أو يعشيه.
وفي يوم من الأيام كان عنده عشاء لربع جايينه .. وجاه ضيوف عقب جهز عشاء ربعه .. وقال لهم الله يحييكم على عشاء ربعكم وحقكم باقي .. ويوم تعشوا ويحلف عليهم ان العشاء والا الغداء بكره لهم .. ولكن الضيوف تعذروا منه وقالوا عشانا حنا وربعنا يكفينا.
المهم انه عقب مامشوا الضيوف قاموا عليه ربعه وقالو يالبخيت: انت عبدٍ خبل .. انت مانت إبن مهيد مصوت بالعشاء ولا انت حاتم الطائي جالسن على درب أهل السيارات .. وعلى درب أهل الافواج وكل ماجاك واحدن ذبحت له ذبيحه.
لانهم كانوا خايفين عليه انه يحتاج لانه كان عنده بيت وحريمه ثنتين .. وقالوا بكره يقاعدونك من الحرس وتجلس لا وظيفه ولا جمعت لك راس مال.
البخيت كان عنده مشب في الحوش يسوي فيه القهوه .. ويوم سمع هالكلام وهو يسوي القهوه .. دق البهار اللي هو الهيل وبدال ما يحطه في الدله .. حطه في براد الشاهي .....
قالو له ربعه انت خربت قهوتنا وش بلاك .. قال انتم اللي خربتوها .. لكن شوفو لكم واحدن صاحي يسوي لكم القهوه انا هوجست
وقال البخيت هذه القصيدة
سجـه مـع الهاجـوس طبيعـةٍ لـي
طبيعـةٍ بـامـوت مـاجـزت عنـهـا
اشكي على الخلاق وارفـع لـه يـدَي
لاكـثـرت الافـكـار يـفـك منـهـا
اما الكرم قـد فـاز بـه حاتـم الطَـي
حتى الفرس من شان ضيفـه طعنهـا
خلوني اكرم فـي حياتـي وانـا حـي
لامـت مـادري جثتـي مـن دفنـهـا
خلقـت فالدنيا وانـا مامعـي شــي
وبـروح منهـا مامعـي شـي منهـا
لابـد مانرحـل عـن المـزح والغـي
ونسكـن بيـوتٍ قبلنـا مـن سكنهـا
مسكين ياللي تحسـب الواجـد شـوي
العافيـه لـو تنشـري وش ثمنـهـا
يا جاهـل الدنيـا تراهـا كمـا الفـي
يا مخبـل اللـي فـي حياتـه ضمنهـا
ان ناحرت لك قامـت تـروح وتجـي
مثـل الذلـول اللـي طويـلٍ رسنهـا
وان دبـرت خلتـك طايـح ومـرمـي
وكـم واحـدٍ لـه حاجـةٍ ماضمنـهـا
يا الله عسى الحسنات تقضي على السي
لا قربـوا للنفـس ذرعــة كفنـهـا
خلقـت فالدنيا وانـا مامعـي شــي
العرض العادي
