المشهوري يرثي والده..

السلام عليكم ورحمة الله وبركاته
إخواني الكرام كل قصيده لها مناسبه
ومناسبة هذه القصيده هي:.
وفاة المرحوم\أحمد بن عيد الهطيعي المشهوري
الذي وافته المنيه وهو واقفاً بين يدي ربه عز وجل
بعدما كبر لصلاة العشاءيوم السبت 10\9\1427هـ
ورثاه إبنه المهندس\عبدالله بن أحمد المشهوري
بهذه الأبيات

[poem=font="Simplified Arabic,4,black,normal,italic" bkcolor="transparent" bkimage="" border="none,4,gray" type=0 line=0 align=center use=ex num="0,black"]

يالله ياللي قاصده ماتنّدم = واللي قصد غيره يحضن الندامه
نعاك ضيفٍ وسط بيتك مكرّم = فرض العِشا في يوم عاشر صيامه
خذ ياملاك الموت روحه وترحِم = ربي عطاك الأمر بعد الإقامه
كبر وعياه القدر لايسلِم = ياجعله التسليم يوم القيامه
في دار عزٍ مايجي له بها غم = والحمد لله يوم صارت كرامه
تشهد له جموعٍ لفتنا ترحّم = ويشهد له صفوف المصلى وإمامه
لاغث جيرانه ولاغث إبن عم = ولا سار في درب الحشا والملامه
ضحاك مايعرف طريق التجهّم = محبوب مرغوب لقاه وكلامه
وصال رحمٍ يراعي العِرق والدم = ولا يقول لقاطعٍ وش علامه
يقول خله في طريقه مدر عم = دامه يغمس خبزته في يدامه
مزاح لوهمه كثير متراكّم = والحر يرعى هيبته واحترامه
همٍ يفضفض لي وهمٍ مكتّم = صرف الدهر مافيه أمن وسلامه
ياعيد هذا العام حيلي مهدّم = فقدت فيك أغلى البشر وابتسامه
حلفت لولا الموت حكمٍ مهتّم = لاشق قبره وارتمي في عظامه
لكن رجاي بخالقي واتوسم = يحسن مكانه مثل ماأحسن ختامه
ويالله ياللي قاصدك ماتندّم = تغفر خطاياه وتعلي مقامه[/poem]

وسلامتكم