بيني وبين نديم الشمال

هذا مراد بيني وبين الشاعر المبدع نديم الشمال
والقصائد لها اكثر من عشر سنوات لكن لملاءمتها
للزمان حبيت ان اضيفها ...فاليكم البدايه
لنديم الشمال
[poem=font=",6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]

بسم الولي منشي حقاق المخيلات =الواحد المعبود منشي الغمامي
من بعدها سر ياقلم واكتب ابيات=جواب مني فوق منه احترامي
للشاعراللي من رجال العميرات=اللي لهم بالصدر عندي مقامي
يم الخوي ودنا ندز الخطابات =ومن قبلهن ودنا ندز السلامي
يابو عمر خابرك رجل المهمات=وهذا جوابي بابعيد المرامي
ياحر يالي فاهم(ن)بالاشارات=لوهي لغيرك كان قلت الاسامي
يامسندي في وسط ربعي الحويطات=يامن عليك اشكي حياة العدامي
ماهوقصور(ن)في كثير الجماعات=مير انت عارف علتي مع سقامي
قمت اتفكر واسهرالليل ماابات=ماهو ولع مع ناقشات الوشامي
ماراح راح ولاعليه ا الحسافات=ولا جيت شاكي من ليالي الغرامي
جيتك وانا فيني من الوقت لوعات=الفين عله يالخوي بالتمامي
اكبر دليل(ن)شيب راسي علامات=في وقت شاب الطفل قبل الفطامي
والحظ قصر بين طيحه وعثرات=قمت اتقلب والعرب بالمنامي
والصبر طال وراس مالي خسارات=والطق كثره فك حتى اللحامي
وعيني بصيره والايادي قصيرات=وفي وقتنا من طالت ايده حرامي
وهذا زمان المصلحه والريالات= وخايف اليا طولت يفلت زمامي
وبين الاوادم يامسلم مسافات=مثلك يميز صفوها والغثامي
والخير فيكم يوم شيل الثقيلات=والخير بالامه ليوم القيامي
والناس واجد والاوادم مقامات=والطايح اللي طاح ماظن قامي
اناقضيتي لوتجي(في عربسات)=ماصدقوا نص الاوادم كلامي
مع الحضاره قاطعين العلاقات=ودي اتطور (كيف؟مدري علامي
عفت التطور وعفت كل الحضارت=راعي الحضاره صارمن شعب نامي
واقرا علينا الفاتحه والتحيات=جرح العروبه ينزف اليوم دامي
لما امتلت كل الصحف والمجلات=من ظلم ناس(ن)ماتعرف الحرامي
وصهيون يعبث بالنساء والشريفات=وكله علينا (مر مر الكرامي)
والعذر منكم كان ما اوفيت الابيات=واقبل بعدعذري جزيل احترامي[/poem]

وهذا الــــــــــرد
[poem=font=",6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
بديت باسم الله رب السموات=اللي خلقنا بعلمه من العدامي
الواحد المعبود داري الخفيات=اللي فرض حج وصلاه وصيامي
من عقب ما جاني حسين الجوابات=اللي وصلني من رفيع المقامي
نسل الكرام اهل الوفاء والمروات=ربع (ن)لهم بالقلب مقدار سامي
يشكي علىّ سود الليالي الصعيبات=ويدور المخراج وسط الزحامي
يالاجودي كلٍ به جروح وافات=مااحدن سلم من ضيمها والعسامي
الوقت له ميله وعثره وهزات=دنياك فيها لفت(ن)وابترامي
لولا نهاري شمس والليل لمبات=من زود حملي ما نظرت الامامي
لكني اعودها على الصبر بسكات=وشكوى لغير الله فيها انهزامي
عمرك لقيت خطوط ما بها (مطبات)=لابد ما لدنياك نور وظلامي
كل الدروب لها رموز وعلامات=واللي يريد الحج يلبس حرامي
اختر حاضرةعرب سيب الخواجات=واترك حضارة خلط بين الانامي
ما ينجذب للضوء غير الفراشات=والعاقبه الموت في جو حامي
والناس ما تخدمك لولا الجنيهات=وانته فهيم وعالماً بالنظامي
شوف البنوك اللي تفلس بنكبات =مااحد ن يمر ابوابها كم عامي
وبعض العرب لانك نخيته برد-مات=من عقب ما هو طن يصبح غرامي
من ساق عذره خلف فعل الرديات =هذاك مثله مثل طير النعامي
احدن بها الدنيا مرصص بدمغات =واحدن مربّخ حبلها والحزامي
واليا ذكرت القدس صابتني اهات=القبله الاولى عليها السلامي
وان جبت ذكره وسط سرد الحكايات=قالوا علينا لا تعيد الكلامي
متولي امره عنك (ياسر عريفات)=وحنان عشراوي تدف السلامي
كنه قضيه شخص ما هي جماعات=كلٍ يبي يرتاح باكل الطعامي
لابد ما يوم(ن)نعيد الحسابات=وننهض من القيعان لين السنامي
ودي اختصرها دون ودي ولاهات=ماني مفصل جسمها والعظامي[/poem]