مشاريه الرجال

نفسي تعلمني مشاريه الرجال
من خوف لا تنقد علي ازوالها

وانا عزيز النفس في كل الحوال
ونفس(ن) تموت بعزها اشوالها

لا ما اتميلح عند ترفات الدلال
ولا جيت اهايط للرجال وجالها

موت الفتى بالسيف يابنت الحلال
ولى حياه تدعي بموت ارجالها

يوم الرجا يبكي على كل احتمال
الخيل ما ترجع بلا خيالها

وجهة نظر يابنت ولى ابسط مثال
تضرب على كف الصدف وارمالها

لاني بتاجر حب ومروج خيال
ولى الاصيله ما عنيت الا لها

وانا اخذت من الزمن عشرة ليال
وشربتها والغبن وسط ادلالها

يوم(ن) نختني البنت في ساعة قتال
ولا كنت أعرف البنت منهو خالها

وانا دعاني الحب من تحت الظلال
واليوم قلبي تحت في ٌ اظلالها

ترى اصعب الحاجات صعبات المنال
وترى اعذب الغايات سيحة بالها

قولوا لها تعود على درب الوصال
آمن لها ترجع هنا واحلالها

ما دام ماتسأل ولو زاد الجدال
نفسي مع المقفين ترحم حالها

حفظت نفسي عن معابير الخمال
لجل الرجال اللي تحب اعنالها

ويحرم علي مشاهدي صفر الدلال
ويحرم عليا شربتي الفنجالها

أما قطفت الورد من روس الجبال
ولا دفنت الحب عند اطلالها

وابني حياتي فوق نهج الاعتدال
واقدم الجزلات والقى اجزالها

ولا جيت ابرر غايتي عند القبال
واعرف حدود النفس يا عذالها

الكامل الله كيف تاصل هالكمال
نفس(ن) خلقها الله من صلصالها

ولا كل من يبرك مباريك الجمال
يقوى على شيل الثقال احمالها

وعزالله اني اعشق عيون الجمال
وشوف الهنوف اللي تحشم اجلالها

واقدر الطيبين واكرام السبال
واحب الرجال الصادقه واقبالها

واحب لون الشمس في وقت الزوال
والميه اللي طعمها بزلالها

يا طيبتي لا هب ذعذاع الشمال
امدها يمنى وامد اشمالها

ويا حبني للبر وطعوس الرمال
وذيك الطوال الراسيات اجبالها

وياحبني للطير وقروم العيال
اللي على الخوه تبيع اعيالها

اللي له بالطيب سجات(ن) طوال
يوم الردي كلمة هلا ما قالها

تبقى القروم قروم لوضاق المجال
وتبقى الرخوم رخوم وآعزالها

ناس(ن) تجر الهم الى حد الثمال
وناس(ن) كذا غنت على موالها

حنا هل العادات والنهج العدال
ذكر الجدود الطيبه وافعالها

يا بنت ما هو كل من رز العقال
ينقال له عز الرجال وفالها

واطلق شنب لا وردت الشينه يطال
وترى شتات الروح عين اهمالها

وانا اشهد الايام دورات وسجال
وما تحصد الاجيال كود اعمالها