يابوي

يابوي جعلك للبقا والمكا سيب
عمري بدونك يالذرا ويش أبي به
وش بك تحاتي لا نوى الموت تغريب
تخشى علينا بالليالي الكئيبة
خذ دلتك واركى على مسند الجيب
وعطني شماغك بلثمه واحتمي به
ونروح لأرض بها العشب والطيب
وتسمع كلام يالغلا تحتفي به
يابوي بنتك لانحكى في التجاريب
كل يشق لهيب الصيت جيبه
يابوي ماني من سوات المحاريب
أللي يجيب لعلية القوم خيبه
وماني من اللي لا مشت حفها الريب
أنا من اللي ما يدنس حليبه
وإن كان زيني فتنة للمصاليب
أحط وجهي بالحريق ولهيبه
زيني أبيعه واشتري سمعة الطيب
إسم ينومس بالصروح الذهيبه
وإن كان عندي بالحلا شي صعيب
عندي حدود ما رظت بالغليبه
دموع القبايل في لقانا مساكيب
كن المقابر لا حظرنا قريبه
خضبت لك كفي من العز تخضيب
ورفعت راسي للنجوم الصعيبه
والله لأسدك بالفعول المصاليب
والله لأشيلك بالرخا والمصيبه
طلع المعالي ماانحكم للشواريب
بنت وأناطح فارس القوم طيبه
وياشيخي إبشر لو تدور الدواليب
بنتك إلى منه عوى الذيب ذيبه

للأسف لا أعرف قائل هذه القصيدة الرائعة والتي أتمنى أن تروق لكم ، وسلمتم