دمدم ٍ تصافقه الرمال

داله ٍ إذا هب النسيم === تايق ٍ إلى درب الوصال

صابر ٍ على الجرح الاليم === ساكت ٍ على ضيم الليال

وارد ٍ لزمزم والحطيم ==== مصدر ٍ مشاويري طوال

ماشي ٍ على وجهي أهيم === ظامي ٍ وادوّر للظلال

خابر ٍ مشاريه الوسيم ==== طارد ٍ ورى ذاك الغزال

ساري ٍ أبي شوف النديم ==== طاويٍ ً دروبي للشمال

عايف ٍ قصيدي والنظيم ==== مسرج ٍ خيولي للمحال

مؤمن بذّي العرش العظيم === قانع ٍ بربي ذو الجلال

دعوة ٍ إلى الله العليم === لو يشأ فرد كل الحبال

أحطبوا من الجذع الهشيم === دمدم ٍ تصافقه الرمال

ما حلا مداهيل الكريم === مجلس ٍ تعاوده الرجال

ما شرى من الهيل القديم === ولا حسب مخاسير الريال

زيّنه على الكيف الفهيم === راعي الملازيم الثقال

وارث ٍ معاميله قديم === متعب ٍ مباهير الدلال

فارق ٍ مثل طلع العديم === لابته مناعير العيال

ما خذا من العرق الذميم === ولا كسب مواصيف الخمال

شيخته صراطا ً مستقيم === وخبزته من الكسب الحلال

حكمته من الراس الحكيم === وحنكته من الشوف العدال

ان حضر يسموّنه حشيم === وان مشى يطروّن الفعال

ماشي ٍ على الدين القويم === عارف ٍ مواجيب الرجال

مرضي ٍ عياله والحريم === جامع ٍ عمامه والخوال

فارس ٍ جسورٍ لو يضيم === مدهل ٍ كريم ٍ للخصال

ماسح ٍ على راس اليتيم === مزبن ٍ كريم ٍ للسبال

الصميدعي سيف ٍ زعيم === ساطي ٍ إلى ضاق المجال

عادته على السبر المقيم === نظرته الى روس الجبال

قومته كما الريح العقيم === فزعته يسطرّها المثال

هيلعي وله طبع ٍ حليم === ولا عرف مداخيل الجدال

ماشي ٍ على النهج السليم === بارك ٍ مباريك الجمال

ما هدم حظوظه ياغشيم === ولا عطا من الشور احتمال