من قصيد والدي عسى عمره يطول

يالله يامنشي العظام الرمايم
يالواحد المعبود يا رب الانسان

يامرسل ٍ ريح الغضب والنسايم
يامحصي انجوم الفلك هي والاكوان

انك اتمم حالنا بالتمايم
وتجيرنا من كل ظالم وخوان

وانك تجملها بستر وحشايم
يلي خلقت الطير والانس والجان

يابوذعار الحظ ما عاد قايم
والحر يا هاجس غدا بين قضبان

بالسجن لي عشرين ليله ظلايم
سجتبي العبره على ربع واخوان

وآعزتي للي ربوعه هلايم
من عقب ما كانوا على الطيب خلان

عشرين ليله مامرح الليل نايم
ما غطت جفوني من الهم سهران

عرفت خلان الرخا والهزايم
اللي على درب الشماته لهم شان

ربع ٍ على الشدات ماهم لزايم
ان وردت الشينه غدوا عج ودخان

وعرفت ان العز ماهوب دايم
واللي اكتمل لابد يجيه نقصان

ومن قدر اهل العزم تاتي العزايم
ولى ترى الحقران تجزى بحقران

والله لا شاكي ولا نيب لايم
يا مار جرح ٍ بالمحاني وندمان

ندمان يوم ٍ لا تفيد الندايم
وعض الاشافي وصكت الحلق البطان

الطيب ما ينقع بناس ٍ رهايم
يصبح رماد وتمسي الليل بردان

ويازين شب النار وذبح النعايم
وسوالف ٍ يطرب لها كل شفقان

ويازين تقليط الدلال العسايم
مصنوعة ٍ بالشام والدق رسلان

يا حلو فنجال ٍ على الكيف رايم
يجلي عن الكبد المراره والاحزان

جمعات ياهاجس وكل امتلايم
في روضة ٍ خضرى خباري وغدران

تسقي ظماها رايحات الوسايم
ليما الحيا يدب في جرد الاغصان

والقاع ممطور بوبل ٍ ركايم
ما داج به طرش ٍ ولا جوه رعيان

ويازين هد الطير والجو غايم
في خايع ٍ عشبه له اشكال والوان

من فرعه راعيه سوى الجرايم
شفق ٍ على برق الدواغر و ولهان

بالقاع لطًام ٍ وبالجو حايم
ان هد اخذ لا صار بالحيل جيعان

كفوفه اللي ما تعرف الهزايم
اللي مشاويله تقل كف ميزان

انا طرب قلبي الا قيل هايم
ممشا ً مع الصحرا ورى ديرة معان

ولى تراها ما تدوم الدوايم
العمر يقفي وآخر اللبس الاكفان

وياراكبين مسودسات الشكايم
سندا الذيول مشرعبات ٍ بالعنان

ذيول شقر إمحجلات القوايم
قب ٍ مضابيح ٍ من خيول شقران

سلموا على اللي يلبسون العمايم
ربع ٍ على وضح النقا توف الايمان

ماهم لفو ولا لصوق ولمايم
ذخر الرجال الي تثمن بالاثمان

وهذي علومي لو ضلوعي هشايم
تصبغ على شناب المناعير وكدان

واللي يجي بين الرجاجيل عايم
يسب اجواد ٍ ولا فيه وجدان

اجواد والاجواد مثل الحمايم
من سبهم ياتي على الوجه خسران

انهج عليهم واغتنم هالغنايم
من خاشر الاجواد لابد ربحان

ولى ترى الانذال نار وحطايم
واللآش لآش وتقرب اللآش تندان

بضاعة ٍ ما سامها كل سايم
مالك بها لوانها فوق الاثمان

واليوم قامت حرب بين الرحايم
وفض اللحم بين القرايب والاخوان

وقامت تشدق بالحكي والزعايم
بعض القرايب الى جوووك عوجان

اقصر خطاوي جيتك وانت شايم
ابعد وفارق قبل ما تخف الاوزان

ودور على رجال البعضها لحايم
ستر ٍ الا ماغبت وان جيت شجعان

ولى ترى كل ٍ يعد الولايم
والطيب ما يصبغ على صحون رديان

وصلاة ربي عد ما صام صايم
على رسول ٍ حافظ ٍ كل الاركان