سيئِت الذِكر

اعوذ بالله الاحد من شرّ سيئت الذكر
ومن قلب ما يخشع ومن نفس الهوى واخلافها

ومن شوفتي لهل الهياط الحمد لله والشكر
مما ابتلابه ناس تبني صيتها بسرافها

بعض الكرم اسمه زرم يتجاوز حدود الفكر
ولىّ الكريم اللي يمدّ الساق قد الحافها

واللي يعيش ابهزمن شايف ولاهو مدّكر
مايتق الله بالدراهم والذمم وانصافها

يجيك خشمه فوق ومقرنس على خشم الوكر
وهو كالنعامه تندغش من راسها لردافها

وانا احمد الله لابتي من وائل ٍ حتى بكر
هامة ربيعه قاهرين الفرس هي واهدافها

الناقصه عند العرب من قبلنا ما تنذكر
واليوم شفت اصخيّف الذرعان هزّ اكتافها

اليا سمع له علم ما صدّق متى يمكر مكر
والله خير الماكرين ورحمته ما شافها

على الشماته عاش يتصيّد مع الماء العكر
وده على الخشم الشحم والمرجله ما نافها

ماهوب قُرّح للخوي وان جاك في هيئة ذكر
لولا الاسم ما تفرقه من خيّته واغدافها

قالوا العرب كل العلوم الغانمه ما هي حكر
عند العرب ولّى الصلب كل ٍ يطول اطرافها

سقها بوجه الله ترى وجه السعد ما ينّكر
كم زلة ٍ عوجه يطوّفها وهو ما طافها

والمجلس اللي ما يجونه هالرجال ولا ذِكر
يحرمّ عليّ ان جيت له , نفسي أنا وآعافها

يلي تحسبون المراجل ليلة ٍ فيها سُكر
لا والله ان الروس عقب الكوس حان اقطافها

واعوذ بالله الاحد من شرّ سيئت الذكر
ومن قلب ما يخشع ومن نفس الهوى واخلافها