غزّ الأبر
****
ياالله أنا بك عن عذابك مستجير
ما بعد هذا الضيق ضيق الا القبر
****
كوتني الدنيا على الضلع القصير
وورتني من وجيهها الوجه الغبر
****
إلين صرت اقول: يا حظ الضرير
بعيـونه لْغبـر الليـالي ما سبر
****
وإن كان ظني خاب حتى فالعشير
فلا عاد لي أيّـة رفيق إلا الصبر
****
والله وصار اللي ما ظنّيته يصير
ومن راقب الدنيا يشوف بْها العبر
****
ومن راقب الناس الصغير أو الكبير
ما يُعـتبر منهم.. إذا ما يَعـتبر..
****
منهم.. وإذا ما يَعـتبر منهم صغير..
ما يَعـتبر منهم.. إذا منّه كُبر
****
كـلٍ يقـول إنّـه بدنيـاه الخبير !
إلين له غُبـر الليـالي تختبر
****
أفداك ياالظبي الجفـول المستذير
خـلّ الكِـبر بالله.. لله الكِـبر
****
وأنا بوجهي عندك إنّـك تستخير
وتبعد عيونك عن عيوني لو شبر
****
ما تكسر الخاطر ترى الخاطر كسير
ما ينجبر واللي إكسره ما ينجبر
****
لا واهنيّـك كيـف يدفيـك الحرير
وأنا عجزت أدفى وأنا بشتي وبر ؟!
****
البارحـة غنّيـت للبـدر المنير :
( مرّتني الدنيا بتسأل عن خبر )
****
ما به جديد ولا قديم يْقـال غير..
بعض الكلام اللي مثل غزّ الأبر
****
تعـال سولف لي سواليف الغرير
و خلّ الحزن بأقصى الضماير منثبر
****
لو باآتكلّم لك عن جروح الضمير
بتنتهي الأوراق و يجفّ الحبر
ويجف الحبر
غز الأبر
العرض الشجري