هذي هي الدنيا حظوظ وتوافيـق
امـا وطـاك الحـظ ولا وطيتـه
تعيش في غيبوبه الوقـت وتفيـق
شـي تذكرتـه وشـي ن نسيتـه
بس الوكاد انه بعد نشفت الريـق
مالك سـوا بنيانـك الـي بنيتـه
والضيق كل انسان به هم به ظيق
ولاكل واحد يسألـك بـه طريتـه
السـد خلـه دايمـا فالصناديـق
من شان ماتصـدم بشـي هقيتـه
والحب لعبه حظ بيـن العشاشيـق
امـا نحتـه نحـت ولا محيـتـه
وتبي الصحيح الي عليه المواثيـق
الحـب حلـق شاربـي لالقيتـه
والطيب فعل وله دروب وطواريق
وسـوه لوجـه الله لامـن نويتـه
وفعلن مهو لـك لاتلفقـه تلفيـق
الحق يظهره الزمـن لـو كميتـه
كم واحدن صيته بروس الشواهيق
ولاتسـرك سمعتـه لانصيـتـه
وكم واحدن ماسمعته سمعت طويق
لكـن يقـوم بواجبـك لانخيـتـه
والي يحمل طاقتك فوق ما اتطيق
الي يلومك خبـل لـو ماعطيتـه
ياكثر مامـروا علـي المطافيـق
وانا الخطا مـن يمهـم مابديتـه
لو كنت ادقق في خطا الناس تدقيق
ماكان حب الناس فـزت وخذيتـه
كم مطلبن حاولت اسوقه ولاسيـق
حاولت به لكن عجـزت وجفيتـه
واضك همي ضك بيـن المعاليـق
خلـه مـدام ان المعاليـق بيتـه
الـرزق عنـد الله رب المخاليـق
ماهو مخيـب رجوتـك لارجيتـه
وهذي هي الدنيا حظوظ وتوافيـق
امـا وطـاك الحـظ ولا وطيتـه
الشاعر / عبد الكريم الجباري
هذي هي الدنيا حظوظ وتوافيق !!
العرض الشجري