على حطة يدك / كل الطعون النازفه .. هـيّ هـي

امانه لارحلتـي ودّعـي قلبـي شـويّ .. شـوي
تراني منكسـر .. مـن سيـرة الفرقـا وطاريهـا




تراني من هـذاك اليـوم .. لاميـت ولانـي حـيّ
ولا ادري عن جميـع النـاس قاصيهـا ودانيهـا



امانه وش معي ؟ .. والا وش اللي من غيابك ليّ !
ياكـود الوّنـه اللـي ماتعـدّت صـدر راعيـهـا



على حطة يدك / كل الطعون النازفه .. هـيّ هـي
بعد .. حتى انشراحـة خاطـري منـي سرقتيهـا



انا مثل الغريب .. وغربة احبابـي طوتنـي طـيّ
اجاهد ضيقتي .. وظروف وقتـي ويـش اسميّهـا



ياويّ من السفر .. ومن الغيـاب المنتظـر يـاويّ
بليـاك الحيـاه الهاديـه وش حاجتـي فيـهـا !



بعد بان الصباح .. وذعذع الغربي .. ومـال الفـيّ
تنّهـت .. وطـرت لـي ساعـةٍ مانـي بناسيهـا



هي اللي باقية لـي مـن لقـاك وذكريـات الغـيّ
تعزينـي بعـدك مـن الجـروح اللـي تركتيهـا



فمان الله .. رووحي .. والا انا مافي يدينـي شـيّ
عسى عيـنٍ جفاهـا نومهـا .. تفـرح بغاليهـا



للمبدع: مشعآن البراق