طال انتحابك للفيحاني
ياقلب يا اللي من عنا الحب مشفوف
مثلك يعذرونه حقيقه إلى خاف
ياقلب في تصليح الاحوال ما اشوف
لي في الهوى مصلح ولا اشوف لك شاف
ما اشوف لك في مسلك الغي مصروف
لي في الهوى مصلح ولا اشوف لك شاف
مابه نصف حاشا ولا حق بالكوف
لو به نصف ماخان بك وانت له صاف
طال انتحابك عند الاطلال ووقوف
ترزم معك وجناك في المنزل الخاف
تلعي خلاوي في مغازات وتنوف
وتجيب ما جابت حمامات الأحقاف
تعوي مع السرحان بالغاف وتحوف
برسوم دارٍ بلقع وصف الاحقاف
تبكي على ملعب خراعيب وخشوف
عقب الونس قامت تهول وتنخاف
ما انت بعلى هذيك الاهوال مكلوف
تنقل حمول تنقطع منها الاكتاف
=================
قصت حبالك للفيحاني
قصت إحبالك من عقب وصلها مي
واستبعدت من عقب ماهي قريبه
ومن المحبة مابقي عندها شي
صارت عقب ذيك الصداقه حريبه
استبدلت من عقب الاسعاف باللي
واستيفست يا صاح ذيك اللبيبه
أمتر صافي مايها العذب وانطي
اصري ولا ظنيت يصفي قليبه
ولا هقيت يعود لي ذالك الفي
هيهات مرجوع القمر من مغيبه
إلا أن تعود عصور شداد ولوي
وألا الصبا يرجع لعودٍٍ وشيبه
ياويل قلبي من بلاويه يا وي
الله الاحد ويلاه ياهي مصيبه
اعدم بقايا صحته منهج الغي
واتلاه صرف الوقت حطه ضريبه
تسمع حنينه كل ما بالحشا ضي
حنين مسيوق الرياح الصليبه
يدوي ولى من حركه ذكرهم هي
وازداد من فرقى الحبايب نحيبه
وان ليم صمم مايطيع العذل عي
مفتون كثر اللوم عيى يجيبه
مالوم كن بظامره يرسم الكي
لي من ذكر قطع الرجا من حبيبه
نوحي حمامه كل مانحت والعي
غريب وانتي ياحمامه غريبه
الكل منا ضامه الوقت والني
واللي شكا ماشاف له من يثيبه
باشكي عليك الحال وانتي لي اشكي
وتعززي لي لو على غير ثيبه
قالت ربوعك وينهم قلت ماشي
قالت بلى وين الذي تعتزيبه
قلت الذي تعنينهم ذبوا الطي
واللي تحريته بهم صار خيبه
تعذروني ياحمامه بلا شي
يوم استمت حبلي وشفت الغليبه
خلوني الخلان واستعذر الخي
اللي ذخرته للخطوب الصعيبه
واللي نخيته عقبهم صابه الدي
ياعونة الله وين من نلتوي به
يا نفس قالت شاقدره ويش بيدي
لى عادها يون التفت مستعيبه
قلت اسمحي من قرب ذولاك وامشي
واستنجدي بالقرم ناصر وطيبه
لو ذي بجاهه والتجي فيه وانخي
واعزيه حيثه كل ما جات ريبه
حامي التوالي حين مايقبع العي
راعي الوفا اللي ما يذير طنيبه
الطيب اللي سادبالجود ياحي
منه حجاج فيه جاه وهيبه
ديم المحل مرغي الفحل كل ماهي
راعي الرحل نسل الفحول النحيبه
حاتم زمانه مثل ما حاتم بطي
راعي العلوم المكلفات التعيبه
في كل يومٍ مطهرٍ للكرم زي
حتى قعد حظه وجدد نصيبه
تشب ناره للمطاليف في الحي
عيد الركايب بن عطيه دري به
عد يشرع لى ورد عد واركي
جزل العطا اللي مايعد الوهيبة
اللي صكونه فوقها شمخ الني
كريم سبل مايوني قصيه
فرز رقي كور العلا عاده اصبي
جابر كسر عانيه مردى حريبه
كم حل عاقات وكم فك من صي
من قيد عسر مشكلات مشيبه
ماشفت من سلوى الى دوحة اغظى
مثله ولا ظني نساهم تجيبه
اعنيك يا عادل صغى المجد لى سي
يامن على صرح المكارم رقيبه
لولاك نضوي ماتخطى ولا خي
عاني ولا عدى نزولٍ قطيبه
جيتك ونيران الهواجيس وري
عساك ما بالجوف تطفي لهيبه
واظن بك عن هقوتي ما تمروي
يامن يعدي حروة اللي هقي به
عساك منظور من الواحد الحي
طول الليالي في حضور وغيبه
==================
الدار للفيحاني
عمن ترحل ساري الدار ياعين
اتعلميها وانشدي ياحزينه
قولي هلك يادار منك غدوا وين
من بك وقف ينشدك ماتخبرينه
هل نرتجيهم هم على الأرض حيين
لوهم مع من في المقابر دفينه
قالت حشى ماهم تحت الأرض فانين
أمس الضحى عني غدوا بالضعينه
مدوا على شبه القنا والعراجين
هجن جليلات المرافق متينه
يومك تراهم يا محمد مقفين
عنك ولا ما عشرتك زا هدينه
راحوا وهم ياولد قاسم معيفين
ما اظن هم لك بالوصل منتوينه
حيث انهم منك حماسى وزاعلين
نياتهم راحت وهي مستشينه
قلت اسكتي عن ذا الخبربس نكفين
يادارنقضتي جروح دفينه
هذا الخبر ياعين هلي النظيرين
بالك لدمعك عقبهم تذخرينه
أبكي على لاماه حتى تذوبين
يمكن تروف قلوبهم يافطينه
والاعساهم لي بكيتي محنين
أبكي عسى ببكاك تبكين عينه
فان هملوك احبابك اللي تودين
وين الذي من عقبهم ترتجينه
قلت أه يا نفس بجوفي تلوبين
ويلاه من قبلب تزايد حنينه
وايش بك على طول الليالي تونين
ماتهجعين الليل كنك طعينه
وبعلتك في كل يوما تزيدين
وايش قوم قلبك مايوني ونينه
قالت على فرقاى شوف المحبين
والوصل يوم انزاح واقفت سنينه
واللي تبدوا لي سواة المعادين
عقب المحبة واظهروا لي ضغينه
من هجرهم فوق الثرى فوق الثرى طحت وانا طعين
بقيودهم رجلي تلوت سجينه
يالله عساهم لي ولوني معفين
عني وحال لي نحل راحمينه
ولا لعل قلوبهم لوبعد حين
تصخف ويذكر كل خلا خدينه
لين ادركوافرقا الفنا واقبل البين
يمكن تصير قلوبهم مستلينه
وبحق من نزل تبارك وياسين
رب ألوذ بعزته واستعينه
اللي حكم في خلقة أدم من الطين
مولاي واجرىبامر نوح السفينه
والحمد والفرقان والنور والتين
والعرش واللي دوب هم حاملينه
واللوح واقسم بالقلم والموازين
واسرار" با " اسمك الاهي وسينه
والحج والكعبة وسيد النبيين
المصطفى اللي حل بأرض المدينة
نذرا علي إن عودوا صوم ستين
لله وارجع للهدى والسكينة
واتوب عما ليس يرضيه واهين
نفسي على شانه وهي له رهينه
توبه لمن يغفر ذنوب المضلن
استغفرك يا عالم بالكنينه
لو كان ذنبي ما تشيله بعارين
عفوك عظيم ليس ذنبي وزينه
انت الضمين وكلنا فيك راضين
وين إيغدي من خان والله ضمينه
فان خنت مالي لا صلاة ولا دين
ومن الرسول ابريت والتابعينه
إلا ولا أسعد بجاه وتيمين
عساي في الدنيا طعوني مكينه
قولوا معي يوم ارفع الكف آمين
إما قضيت القول يا سامعينه
كله على شانه تعرضت للشين
لعل حسن الضن يدخل يقينه
بلواي عن كثر الملامات تكفين
أكبر بلاوي الرجل قصت يمينه
واليوم ماني ذاكرا في المخاوين
أحد يحن الحال والا يعينه
غير الذي في الضيق ينحى المعادين
راعي القناة الطايلة والسنينه
أحمد نخيتك يا شبب كل ناخين
يا القرم ياللي ما يخلي **ينه
يا ابا العوايد في الشدايد وفي اللين
أنخاك يا راعي العلوم الحسينه
يا سترغضات الصبايا ونعمين
بك يا ثقيل الروز عند المحينه
انظر بحالي يالاخو وابتصر لين
تشوف هم لاجي في البطينه
يا طول ما بانخاك وسط الدواوين
دوم على شده زماني ولينه
فان كان أخو مالكا تركني فانا وين
غادى وشوف الخير ويني ووينه
=============
هاضني للفيحاني
هاضني وحدث شجوني
حب ناس ما يبوني
يرقدون الليل كله
والسهر قطر عيوني
لو يبوني كان جوني
في وعدهم ما اخلفوني
يوم شافوني مسير
سيروا لي خلفوني
دايرين للسبايب
يالها والله عجايب
قصدهم قطع المواصل
وش عذرهم مالقوني
كان ذا فعل الحبايب
دايماً كله مصايب
يوم شافوني مكرف
ناويين يطبعوني
يديحوني بهبايب
في دواليب وسوايب
يحسبون اني رعاعة
يطبع ان كرف شراعه
مايشوفون الركانه
والعقل مشحن خنوني
ما الموده يا الرباعة
مثل تدوير الفقاعة
لين سحتم في البراري
في التنزه تفقعوني
كان لي موده
رده يا الربع رده
هذه الليله وعوده
من هل الحسن انقذوني
========================
===========
وهذا الحب بالزفرات يشوي
ألا يا ويلكم يا عاشقينا
يلين من المحبة كل قاسي
ولو قلبه حجر يازي طحينا
======
يابو علي ذا الحب غربال وانشـاب
وهذا الهوى يا خوي مرً شقاوي
شفت المراقي منه وعرات وصعاب
كم واحدٍ خلاه في الفـرش ثـاوي
هني من عن ذا الهوى والولع تاب
وكفاه ربـه مـن غرامـه دعـاوي
ورحم الله الشاعر ومحبوبته
وختامها السموحه با التقصير
تحياتي لكم جميعا
رد: الشاعر العذري محمد الفيحاني ( مذبوح الوديد )
العرض الشجري