البارحه عين الشقاء عافت النوم

البارحــــه عين الشـــقاء عــافـــت النـوم .... تذكــــرت عـــــاده غدت بين زيلـه
عاده لـها ميـــــزات في كــل شغــــمــوم .... واليـوم خفّـــت عقب ماهي ثقـــليه
لا بــاس لو بـاقــي لها رمـــز ورســــوم .... بعض العـرب مايعتبـــرها وسيــله
لو هي وسيـــله تربـط القــــوم بالقــــوم .... ومفعــــولها غيظ الخـواطـر يزيله
اللي مــضى الشيـــمه لها ثــوب وكمـوم .... ويامن بلزمتــها الدخيـــل ودخيـله
واليـــوم خـلاها الجـــهل جـرف دمــدوم .... من عقــب ماهي للنشــــاما نحـيله
واسبــاب مابيّــح خــفا ســـر مكتــــــوم .... علمٍ سمـــعته زود الصــــاع كيـله
مصـدرنباء من بعض الأشخاص مزعوم .... يضـوي مع الحايـف ويجفل جفيله
سيّـــرت مسيـــارٍ على نـاس مصــــدوم .... أصبـح نهــاره مظــــلم مثل ليـــله
ما قصـــروا فيّــه مقّـــــدر ومحشـــــوم .... لكن غيــّــم في سمـــــاهم مخيــله
صبّــــت بــردها فــوق وديــان وحــزوم .... وتجــاوز الواقــع مجــاري مسيله
وجــاني عن الغــيــمه سوالــيف وعلوم .... والســالفه صارت عريضه طويلـه
اثـر المواصــل بين الأصـحــاب ملغـــوم .... لوغــدوا حدب السيــوف الصقيله
لفيــتـــهم في عـلــم وأنكــــــفت بعــلوم .... وصــار التفـــاهم حيله مستحيــله
أدخـــل لها الشيــطان وسـواس وحـلوم .... وحل الثـقه بين الزميـل وزميـلــه
واللي حــــدث بيـن الاشــراف مقـســوم .... ولا لي على حـل المقــادير حيــله
وان كان بعــض النــاس وجه لي الــلوم .... يقبــل ويعطـــيني وثــايق دليــلـه
في غيــــبتي لايـركــب المــوج ويعـــوم .... وعليّ مرجــــوم المشاعـر يشيله
أنـا أتقيــــد في قــــــــوانين وســـلــــوم .... وأجامــل الصــاحب وأخفف ثقيله
وعنــدي خفـــــايف زلــتــه تنتــهي يوم .... ما أنشــر دعــايتها لمومي شليله
ما أعـامل الصـــاحب مثــل عمــلة القوم .... ألقي له النظـــــــره بعيـنٍ جليــله
ألا ليــــــــامنه نـفــخ رأســــــــه الــزوم .... شطرّت نـزلي عن مـــواقع نزيله
وإن شفــت وزنــه مختلف عنه أنا أشوم .... وش عــاد لو دمي ودمـه فصيله
مهــما يقـول بغــــيبتي عنه أنا أبا أصوم .... مانـي مجــرب سبق خيلي وخيله
لو إن رمـــــيي بالمـداريــــع ملــــحـــوم .... أما اعطــب الخيــال والا الكحيـله
وليا عــــلق حـــده بالأضــــلاع مسمـوم .... يخــج مبـــروم الغـــلاف ويشيله
لكــن أنا مانــي مغـفــــــل وعــــمـعــوم .... مثـل الذي جاب الشمالي حصيـله
ولا ني على نفـــــخ المشـاهـيب ملــزوم .... ولا أحـول من بين الخليل وخليله
لو كـــان ما أقـــرأ حــايزٍ عـرف دبـلـوم .... لوشفت زلــة صاحبي ما ألتوي له
أفهّـــمــه بأسلــوب هــاديء ومحكــوم .... بالعقل أحكمــه قبل يطـــلع حثـيله
مانـي بمثـــل اللـي سرى الليل منجــوم .... تـاه الطريـــق وضــيــع الله دليله
وأصبح يبيـع ويشتـتري غيب ويســوم .... يلـــمها واجد وتصـــفي قلـــــيله
أنا خــذيــت من التجـــاريب معـــلــــوم .... وأعرف زمان اليوم وأسلوب جيله
وأعرف قوانين العـرب وأعرف الــروم .... عاقــل وأعيش مع العقـول الهبيله
لـو كان ماني من خطأ النفس معصــوم .... اشــوم للجــزله وأخــلي الهــزيله
وطـرد الكلام اللي تقــــل روج عيسـوم .... على رجـال العرف عيب وفشــيله
مثل الذي عـاف البـــلح واشتـرى الثوم .... وأصبــح يشمه بالخشــوم ويكيله
ماهــوب لامشـروب ولاهـــوب مطعوم .... ولا يقبلــه ذوق النفـــوس النبيله
وإن حـل بين اثنيـــن شاتـم ومشـتــوم .... شـرهوا على العاقـل رجال القبيله
وأصبح بها تركيــز الانظــــار واللــوم .... على الذي يرقي الطويـــل ويميله
وألا الغشيــم اللي من العـــرف محروم .... يشره على صب البحـور بصميله
يمكـــن يخيــل له يحــــلق مع الحـــوم .... وينزل مع الهدهـد ويرحل رحيله
وتم الجـواب وبأفضـل القــــول مختوم .... وصلوا على المختـار راع النفيله

أجمـل ما قرأت للشـاعر // بـدر الحويفي
أتمنى أن تروق لذائقتكم