القهوة الساده وراس الفراوله
واحساس لا يمكن يعيد المحاوله
البارحه ما غطغط الجفن بالكرى
كن الليالي ماخذتني مقاوله
آثامر الفنجال واسري بفكرتي
شباك من حولي وكرسي وطاوله
احجار نرد وكيكة العيد والشمع
والهم اسهرني كثر تطاوله
أنبّه الملعون من بعد رُقيتي
ابيه يسلم قبل سيفي يصاوله
وآمد شبحي فوق واناظر العلا
لإن مالي في عريض المجاوله
يالحية ٍ ما هي تشّيب تشّيبي
سهم الوقار ان طاح محد ٍ يداوله
ياليل مابي حيل لا تكدر الصفا
ماعاد باقي شي فيني تزاوله
والغربه اللي بين ربعي ولابتي
مثل النهر جفت مسايل جداوله
الليل يالمحبوب قد عانق الفضا
وانا اشيل الهم بيدي واناوله
القبعه ما زودت هيبة الفتى
والحر صعب ان هد تخطي مشاوله
ترى الفتى لاطاب طيبه مع العرب
اما العمام اطياب ولى مخاوله
والعنكبوت اللي تخيط نسيجها
بقعه كفى الله شرها مع مهاوله
اما أعيش العمر سالي ومبتهج
ولى الحزن تحطب عظامي معاوله
القهوة الساده وراس الفراوله
العرض الشجري