الحاجه مُرّه

يا شينها لا جاتك ايام محتاج
وماتشوف لك رجال يعطيك حاجه

كل ماتقول الرجل ذا طلق الحجاج
اليا طلبته كدرك في حجاجه

وكل ماتسد الباب في وجه الازعاج
تجيك من خير العيال السماجه

الله من ربع ٍ خرافين وانعاج
حطب مقابر في عسلهم مجاجه

اكبرهم اللي لابس ٍ ثوب ديباج
يمشي بعكس الناس كذب وعواجه

واصغرهم اللي يبلع الضب لا هاج
الحلق مدفع والعزايم دجاجه

يا وين ابلقالي على طيب هداج
ماهو بطيب الصانعي والخواجه

اصعب حياه تمد الايدين محتاج
وشربك على يد الرجال الهماجه

وشلون لو مانحسب احساب الاحراج
ما شفت لي رجال عند المواجه!

اصد وادوّر مع الروح مخراج
واقول يا ربي عليك انفراجه

الحاجه المره توردك الامواج
والوجه طامي فوق لوح اللجاجه

كم تستحي كنك على صالي الصاج
لا صار وجهك منبني من زجاجه

اللاش ما يعطيك ماس ٍ ولا عاج
ولا يمكن اتعكّر همومك مزاجه

والطيب فطره والردى ماله اعلاج
واللي خلق له ما يفيدك علاجه

الناس ما تفعك لا صرت محتاج
النافع اللي تطلبه كل حاجه

سبحانه وتعالى