مداهيل البَرد

ليه يادنيا تورينا الهموم ’’’ والسعاده تنقلب غم ونكد
ليه ضحكات الاماني ما تدوم ’’’ وليه احلام الفتى كثرة عدد

شوف حظي كل ما وده يقوم ’’’ عند اتعس حد ياعالم قعد
ويش اسوي بحاجة(ن) عند اللزوم ’’’ والمتى والقلب عايش في كبد

الله اللي بس في خلقه رحوم ’’’’ غير وجهه ما احد ينفع احد
النصر دايم لمن يبدا الهجوم ’’’ سل سيفك واشهره وقت الهدد

البضايع ما لقت منهو يسوم ’’’ افرق السومات يا وجه السعد
ما يهم الرجل تكسير العزوم ’’’ والشكيمه دقها دق الوتد

الصحيح الناس نقالة علوم ’’’ والبشر تنقد على حظ الولد
والبلا بغراب من فوقي يحوم ’’’ ما لقى غيري بحاااارات البلد

اشهد انه حظ ما وده يروم ’’’ الرماد يطير لا منه خمد
جرفتني بالفلا ريح السموم ’’’ واحطبتني دنيتي يابو حمد

يا وجودي كل ما شفت الحزوم ’’’’ اقسم اني للجلد راعي جلد
لو وطيت الشوك حافي للرجوم ’’’ المهم ادهل مداهيل البرد

مسكني في حيد تغشاه الغيوم ’’’ إيه أطلق من حبال (ن) من مسد
البشر لو ما تزينها السلوم ’’’ كان ما واحد على الثاني عمد