ودك تعيش بهالزمن صير لبناني

كلمه اعاتبها الزمن لو تحداني
يمكن رجال الوقت توحي وتسمعها

وقت(ن) يفر الراس والقلب مرضاني
تحتار كيف الناس ودك تجي معها

ودك تعيش بهالزمن صير لبناني
لبس طواقي كيف ما جت ورقعها

واسمع تجارب رجل عايش وغلباني
مؤمن الا ما ضاقت الله يوسعها

عايش ومستانس وباكي وشراني
وخلاصة الايام بيده مجمعها

ترى رجال الدين تغلط بعنواني
واهل الفكر واهل السياسات بقنعها

ان وقفت الدنيا على طول بيباني
عرفت نفسي وين ماجيت اسنعها

هذا الزمن جيته ولا هو من ازماني
غلطه تبي تحكي وسدت مسامعها

عيا زمان الصدق لكون غلطاني
هو ما لقى غلطات غيري يتبعها

لإن الصراحه بهالزمن ترم الانساني
وتفتح عليه ابواب دايم يقارعها

رب الافكار ابكار تنهج على الثاني
ورب الاماني اقصار يومن نوادعها

كل الطرق ادت الى درب روماني
وتفاحة الجنه ثمرها لزارعها

ماتربقت روس الخلايق بقيفاني
ومن لا فهم معنى القصيده يمزعها

قرناس حظه طاح ما بين عقباني
وقت الهدد يشبع كفوفه ويشبعها

ما همني من ضحكة فلان وفلاني
وحالف رجال الوقت اني للكعها

واسمع ضمير(ن) تايه بأرض وجداني
وش حدني له دام الافكار يدفعها

عيش العمر كنك على الارض سلطاني
والزود نقص ونفسك احفظ تواضعها

واصبر بحكم الله ولا تصير حيراني
ونفسك عدزك لازم انك تطوعها

وخل الزمان يدور بالظالم الجاني
وبيبان تفتح هم لا لا تشرعها

وانا اخذت من الزمن كل ما جاني
وعرفت الخشوم شلون امشي واخضعها

صندوق سرك لحده بين ضلعاني
لإن السوالف لا بدت صعب تمنعها

ولا بحشم اللي لا قسا الوقت يجفاني
لا نافع(ن) نفسه ولا الناس نافعها

والهرج رتبه قبل لا تخف الاوزاني
من خوف كلمه لا طلعت ما ترجعها

كلمه تخيرها ترزها بعمداني
آخير من كلمه تبلعم وتبلعها

ترى الكلام الشين ما يرفع الشاني
ولا فيه حشمه كود الانسان يصنعها

والطيب كايد والردى شي مجاني
واللي يبي روس المراجل يفرعها

طبع الرجال ان صكت الحلق البطاني
تغد العيون عيون لازم تقلعها

وطبع الاصايل ينعرف دون برهاني
ولى الكدايش يا ولد ما تطبعها

وعمسات الاريا تجعل الرجل بحلاني
وش عاد لو حوله رخوم(ن) يطاوعها

بعض الرجال يجيك خير وحقاني
وبعض الرجال لبذرة الخير يشلعها

وبعض الرجال يجيك وافي وملياني
وبعض الرجال ان صار ما صار بايعها

وبعض الرجال يزبن الضيف والعاني
ضيان بيته لا لفيته مولعها

شفت الرجال انواع واشكال والواني
ندر الحرار اللي تنومس مطالعها

واهل الردى في قربهم لازم تعاني
وادع الحرار اللي ترزها براقعها

هذا الزمان اللي رثع بي وأذاني
وجرد علي هموم بقعه وفزعها

والله ليبطي هالزمن ما تحداني
مدام نفسي طول الايام رافعها