اسير الله في ارضه وليله ما تبل الريق
أطالع حولي الدنيا سجين ويا عساه افراج
وكل ما جيت لي عنوان يلف يدور فوق الضيق
ولا بيني وبينه غير صمتي وآخذه مخراج
لعل البخت تفتحله شبابيك(ن) على التوفيق
وترجع ضحكة الشايب وتبهج خاطر الدواج
ألا يا جدار ذكرهم عسى الناسي معاك يقيق
تعبت امدلك يمنى وتعزي خافقي الوهاج
يموت الورد بجفاني ويرسم دمعي التفريق
يغيب اليوم ويرجع لي معا باكر ونابه عاج
والا مريت لي ديره مشت رجلي معا ذا السيق
الين القابه دروبي وشط(ن) يردم الامواج
انا حتى جروح الوقت تجبرني اعيش بضيق
الا يا هي كثيره مير ما تسكت مع الهراج
انا اللي بقق عيونه وناظر وش ورى التحديق
واشوف الحظ ربقني بربق ورقعتين وصاج
انا كل الشموخ اللي يعانق قمتك يا طويق
حمام (ن) يبسط جناحه ويرقا عالي الابراج
ويا هي دنيتي دنيا شماته وحزنها تصفيق
والا عزي لمن ربعه غدوا فيها سوات نعاج
ابقطع حبل افكارك من الدهشه من التحليق
وامر جدارنا الطيني وانادي ياطليق حجاج
جروح اطفال اداويها تأنبني وعيني تويق
وعلى رزنامة احزاني وقصة فيلم طويل اخراج
وجدت اني بليا ذنوب وحطوني بهالتحقيق
وكرسي ما يشيل من الندم ماغير وجه احراج
وزهر يعيش وزهر يموت وفراش يدغدغ التشويق
يرجع ماض(ن) احلا من السفره على الميراج
اقول تليق بي حالي وفي نفسي حشا ما تليق
لإن اكبر قناعاتي قناعات الفتى المحتاج
ولو تلوي ذراعي قبضة الراضي بهالتلفيق
اكفكف دمعتي بيدي واقول عراق يا حجاج
لويش تجامل الدنيا وامامك زوروا التوثيق
ولويش تعاكس الصوره بنظره والمرايا زجاج
وانا وان مت ابي اشيا تباعدني عن التضييق
لعل القبر ياسعني واشوف من الفجاج فجاج
أسير الله في ارضه وليله ما تبل الريق
اطالع حولي الدنيا سجين ويا عساه افراج
أسير الله في ارضه
العرض الشجري