لا حانا ولا مانا

يشوش الراس الى حد الثماله والقصيد ابداع
عليم الله يديني لبعض الشعر اصفقها

وهي صفقه وقوم ارقص وغنيلي مع الايقاع
نياشين الجزاله والشعر مبطي معلقها

ولاهي حكر لعيال الاصول ولا على الصناع
يظل الشعر للعالم ورب البيت رازقها

بعض شُّعار يجلون المرار ويشبعون اشباع
يحط الحبك فوق السبك يصهرها ويطرقها

وبعض شُّعار لا حانا ولا مانا بدون اسناع
واذا يصمل على فكره يغربها يشرقها

يشكلها يلونها يهيّشها مع المرياع
يحسّبها نعاج الحلب يومنّه يربقها

احد يكتب لجل غيره واحد يكتب لجل ينذاع
واحد يكتب لجل غايات في نفسه يحققها

وبه شاعر مثل شمس النهار ولا عليه اقناع
يوزّن كلمته بالماس قبل الفم ينطقها

مهندس حرف ربان السفينه للرياح اشراع
معلم شعر له هامه صعب جدا ً يدنقها

وبه شاعر موهوه يكتب ابيوته وهو مرتاع
يبي يرقا وخطواته ابد ما هو بواثقها

بعضهم يكتب انصوصه ويقسمها ثلاث ارباع
ربع للبيع , ربع للحب , وربع يقول بحرقها

وبه شاعر مقلد يصطنعها والخداع اخداع
يقلد مشية الطاووس وده لو يطبقها

وضيّع مشيته مع مشية الطاووس تاه وضاع
وعلى نفس الاثر كلب الاثر لا شم يلحقها

بعد عينه قويه يقلب الدنيا اذا ماجاع
وعيني عينك افكار الجزاله جاك يسرقها

وانا بين القبور واقعي امشي وانا جزاع
اشوف بعيني الصدمه اكذبها واصدقها

بنادول الحقوني لج في راسي كثير اصداع
تراني معتزل قمه اذا غيري تسلقها