من القديم

الله من رجل(ن) همومه بواريد
حزنه زهاب الموت ودموعه حراب

كثر الحكي في بعض الاحيان مايفيد
والصمت حكمه للرجاجيل الاشناب

أما حشمنا الخيل عند المواريد
ولا عسفناها ولا نحسب حساب

دار الهوان ولا ديار الحواسيد
وحرب الدمار تهون عن حرب الاعصاب

شكواي عالرديان عيب ومناقيد
لا شفت خلان الرخا بين الاصحاب

وين الرجال اللي على النعم والجيد
ستر وغطا عند القرابه والاجناب

والقول هيَن والغبن يلحق الصيد
والطيب سندا والردى يغلق الباب

انا وحزني والألم والتناهيد
وعيشة آسى وسط الجماعه والاغراب

مثلي اعتزا في راس من ينطح الحيد
من طيب شيخ(ن) ما يجي فيه نتَاب

ابوي دامه حي ما همني كيد
يبشر مدام الحق يتلاه طلاب

والعالم الله من ربينا على الديد
خوينا ما يلحقه لوم وعتاب

وش رخمك ياطير عقب السراهيد
طلعك قريب ويدرع الحوم الغراب

الذيب لو عقًب يعقب صناديد
ولى ثعال تشيخ في بشت الذياب

ياما حملت النفس لدروب ابو زيد
من خوف كلمه تلحق الروح وانعاب

ومن كثر ما احس الخلايق بهم كيد
بديت احس ان المكايد لها اسباب

نار الجحيم ولا جنان(ن) مواريد
تلقا بها ناس(ن) يخضَعون الارقاب

اسج عن نص البشر واطوي البيد
ارض(ن) بها طيَب ولا ديرة ازلاب

ما تنسكن جنه وفيها مفاسيد
وما تدهَر روضه بلا زهر واعشاب

هذا نصيبي كيف ما جا بتحديد
وهذا بلايا وش بلا ابوك يعقاب

وهذي ثلاث سنين يا شيخة الغيد
ودك بعدها آبدل الحب بتراب

لا والذي خلاك يالليلة العيد
ما ابدلك يابنت وش جاب لش جاب

الهيلعي لو عاش عمره تساهيد
لا بد ليله تنشلع شجرة الداب

حبيبتي ماني مع الحب ولَيد
يا ما سهجت الروح لعيون الاحباب

ما فيه داعي نقول ونعيد ونزيد
دام اليتاما يتمَوا والامل خاب

الجسم هو الجسم والايد هي ايد
ما تخرب الدنيا ولو طال الغياب

وهذي ليال التيه مثل العناقيد
احيان فيها الخير واحيان ترتاب

مرّن ثلاث سنين يا شيخة الغيد
تبين ابيع الحب في حفنة تراب ؟