كبوة جواد ....

كــبــوة جـــواد

صعب لامنّـك فشلـت ... وصعـب لامنـك لقيـــت

إن من يكـره نجاحـك... يـدري إنـك مانجحـــت


أمس ضقت ورحت أقلّب ذكرياتي .. وانتهيـت


عند صورة طفل صوته مثـل صوتـي لاانجرحـت


وش مثـل ..لا والله إلا هـذا أنـا يـوم ابتـــديـت

أنطق حـروف ٍ تلعثـم فـي لسانـي لا انمدحـــت


هذا انـا يـوم الحيـــاة فنظرتـي عشــريـن بيــت

ومسجدين ومدرسه من طين كم فيها اصطبحـت


هذا أنا وأصبحت اتمتم : " هذا انا " حتـى بغيـت..

.. أختنق .. بس القدر عيّا على موتي .. وطحـــت


وصاح صوت الطفل فيني : " أنت من وين ارتميت"

قلت أنا المستقبل اللــي فيـه كـم همـت وطمحـــت


أمس كنت أبيـك تكبـر .. بـس والله لـــو دريـــت

إني اللي عشـت لأجلـه مـتّ عنـدك وأسترحـت


لو دريت إن الزمان يجـرّ رجلـي .. مـا عديـت

ولو دريت إن البحـور بـلا موانـي .. ماسبحـت


كان دربك لـي طويـل .. وكـل ماشفتـك هويـت

قلت لك : كبوة جواد .. ومـا كبيـت إلا وجمحـت


ليـه تسمعنـي وتمشـي ؟! آه ليتـك مـا مشيـت

و آه ليتك مـن كثـر عثـرات الأيـام أنتصحـت


ضاعت احلامي .. وظلّ الحزن فينـي .. وأهتديـت

للطريق اللـي يودينـي علـى دمعـي .. ورحـت


يالحزن .. ليتـك مثـل دمعـــي وتنـزل لا رقيــت

بس أعرفك لو مسحت الدمع تبقى ما انمسحت !


كان حلمي .. في وجـود إنسـان يبكـي لا بكيـــت

وصار حلمي .. في وجود إنسان يفـرح لا فرحـت


كنت أشوف الناس مثلي كل مـا جعـت وضميـت

مادريت إن الأوادم نـاس فـوق .. ونـاس تحـت


آه يـا أول ذكرياتـي خذنـي فحضـنـك نســـيـت

لأسألك عن وجه ابوي اللـي معـه يامـا سرحـت


خذني فحضنـك أبغفـى .. يـاه مبطـي ماغفيـــت

وإن لمحت دموع عيني .. سـو نفسـك مالمحـت


خذني فحضنك .. وبعثر في جروحـي وإن قضيـت

هزّ لي كتفي .. وقل لي : عيب تبكـي لـو سمحـت


إضحك .. وعلّم زماني من أنا .. ومن وين جيـت

طقّ باب الحزن .. واصـرخ فـيّ لامنـي فتحـــت


و ضمّني يمّـك .. وكمّـل ضحكتـك لامـن بكيـــت

ودي أذكر.. كيف كانـت ضحكتـي لامـن فرحـت !


الشاعر

فهد المساعد