شاب الغراب

يا غالي الوسم إنتهى و أنت ما جيت
لكن مطرْك إن جا يخفف عذابي

ياليتني من دلّتك ما تقهويت
من عقبها ما ذقت لذّ الشرابِ

و ليتك مقابل ناظري ما تعديت
من حينها هبّت سنين إغترابي

شاب الغراب اللي نعق يوم مرّيت
وش عاد تبغى يوم شاب الغرابِ

أتعبت رجلي في مساريك و أحفيت
و أشوف عنك البعد مثل إقترابي

أخطيت في حقي و أنا قبلك أخطيت
يومي هقيت الما بعرض السرابِ

صرت أتغابى لأجل عينك و حسِّيت
إني غبي من كثر زود التغابي

أوّل ضلوعي سورك و خافقي بيت
من دون ما يشناك ضرب الرقابِ

يا صاحبي لو عن مرابعْك شدّيت
زرها و لو مرّة تشوف الخرابِ

وتناظر أي إمصيبة و جرم سوّيت
يمكن ترقّ إن شفت حجم المصابِ

كم واحدٍ حي و هو بالخبر مِيْت
و كم واحدٍ مدفون فوق الترابِ

خذها نصيحة عقب ما رحت و أقفيت
لا صرت تروي قصتي للصحابِ

ترى غرام الكون لا قلت و أرويت
بدا بيوم ولادتك و إنتهى بي