المشيخه ماهي بشوت وملايين
وختمٍ طلع بالواسطه والميانه
ولاهي بنشرالكذب وسط الدواوين
والفخفخه والفشخره والخيانه
ولاهي بنفخ الصدر عند السفاهين
وتظاهر انه صارعنتر زمانه
واللي تصيقر وهو ضمن الكراوين
ختمه ومايملك يزيده مهانه
بكره لياجا للمواقف براهين
وكلٍ على فعله يقدم ضمانه
تبي تكشف كل الأوضاع وتبين
ويعض منهو محتزم به بنانه
لا جا التناقش وانبرى الجيم للسين
يرسب من اول يوم عند امتحانه
ينشب لسانه فاللقاء بين لحيين
ويروح بأفواه العواذل لبانه
المشيخه صبرٍ على العسر واللين
وبذل وعطا واخلاص ذمه وامانه
والمشيخه للي يفل الجناحين
ويضف ربعه في وفاه وحنانه
والمشيخه صد الخصوم العنيدين
والحزم والشده لقوم اللعانه
وان ثار عج المشكله بين خصمين
يبرك وعشره ماتعود ثمانه
والمشيخه بذل الكرم للكريمين
وبيتٍ تعرفه قبل لايقال عانه
وعطفٍ على المحتاج ومغربل الدين
وصيتٍ طغى مسكه على زعفرانه
شيخة شرف ماهي بشيخة وراعين
شيخة كريم المجد جود عنانه
حكيم ينصونه قرومٍ حكيمين
يستأنسون لحكمته ولبيانه
سوالفه تشرح صدور الحزينين
والصدق والحكمه عوايد لسانه
مجده مورث من شيوخٍ عزيزين
ساسٍ وثيقٍ ماتزلزل كيانه
هذاك لو مايملك إلا ريالين
له في قلوب الناس قدر ومكانه
صيته يشرف عند الأدنى والأقصين
ودايم بفعل الطيب كاسب رهانه
لامر ذكره قالو الناس نعمين
وجهٍ يزينه الرضا والديانه
يغنيك عن شوفة وجيه الشياطين
عبادة الدينار روس الخيانه
وش عاد لو حطو ختوم وملايين
مال الردي نقصٍ عليه ومهانه
زياد الضبيان
المشيخه ماهي بشووت وملايين
العرض الشجري