الله على السمرات ..ليل ومطر.. وروض خضر .. وسمر منه جمر...هيل ودله .. وكاسة شاي مع قرص ملة ... وجلسة مع عجوز وفلة ....
قلت انا افداك ياجدة كملي السولافة وعلمينا عن جدي وافكاره ..
ردت الجدة بعد ما عدلت المركا وارتشفت من الدلة ..
صلي على شفيعك محمد واذكري ربك لاجل نكمل ...
ابوي شار على عمي يزوج جدك بالحال ويصونه عن الحرام ...
وماله الا بنت عمه تضفه وترعاه ...
وانا بين بهيماتي ما ادري عنهم ولا وشهو الاتي .
كانت الدنيا ليل يوم ابوي ارسل جدك للشايب جارنا يكون شاهد بينهم ..
وكان الزواج من اول بكلمة عطيناك وقبلنا ..
لكن كنت انا غير لحقت اول عهد بن سعود يوم خطوا القلم والزمونا بالكتاب ..
فزع جدك للشايب وكان عند عجوزه نايم ..
هبه من عز نومه ..وقال تعال بالحال ابوي وعمي طالبينك .
جاهم الشايب محتار وش اللي جرا وش اللي صار ..
قالوا بغيناك تشهد ترى جوزنا البنت للولد ..
وخمس من الابل من عمها سياقها ..
ومن باكر كدوا على جمالهم قاصدين اضبه ..
لاجل يكتبوا عند المطوع ..
كل هذا يابنيتي وانا ياغافل لك الله ...
العب مع الطليان واتحرى يجيب ابوي السكر والشاي ...
ضويت المغرب مع غنيماتي ..
الا والعرب متجمعه واسمع الحريم اللي تزغرت واللي تغني ..
يوم امي قبل اصل تقبلتني الله يكتب لها الجنة ...
تغلمطني بخرقة وتخزني بالخلة ..
وانا من سبايب فعلها مخترعه ..
مادريت ان الليلة عرسي والناس ملتمة ..
مير الله يغفر لنا ولوالدينا نفهمها بالفطرة ....
وهذا عرسي وصار من غير زفة وسشوار ..
ولا تكلف وزينة .. ماغبر منقب ياحليله وزينه ..
لبسته ومن فوقه الخرقة تستر الخافي وتضفه ..
لكن ياحليله جدك ظلت مصر بقلبه وعقله ..
وماطولنا من عرسنا ....
الا بليلة جاني يسمر ويسولف ..
عن الخير بمصر غير .. فيها علم وفيها شي ماينوصف ..
فزعت وقلت ياولد عمي لعيناك الله يسهل دربك وخطاك ...
تيسر واخطر وانا هني اتحراك ..
احفظ عرضك وحلالك ..
شد على بعيرة واقفا وعند ابوه خلاني ..
ارعى غنمهم واتحرى جيته عندهم ..
ياعالم يجينا بعد الحول والا تاخذه منا الايام ولا يعود ..
حال علينا الحول .. واتبعه الثاني منه ست شهور ..
وانا ربي رزقني بخالك البكري ...
وجدك علومه نسمع فيها مع الطرقيه ..
يقولون صار مع التجار ...
بيع وشرا بين مصر والقدس بفلسطين ..
صيته طلع بين العربان ...
يطرونه بقصصهم انه صار رجال ...
.......................................................
ومن باكر اقول لك باقي السالفة
ودعتك الله روحي نامي يابنيه
..........................................
تحروني بسولافة جديدة
اختكم ندى الصبح
اتقبل نقدكم
رد: حكايا جدتي ...بقلمي ندى
العرض الشجري