اعتراض عالمي على العمدة

العمدة مثل ما تعرفون راعي سجات و دجات في ريضان الانترنت .
و في وحدة من الدجات لطشت التوقيع الي تحت .
نسيت منين .
المهم ما لقيت شي يصلح غير ه .
و مثل ما تعرفون العمدة غشيم في الفوتوشوب و هالسوالف الي توجع الراس .
و مستحي اكلم بل غيتس يرسلي احد من عنده يعلمني .
انتم عارفين انه مشغول
و البدوي من طبيعته دايما ياخذ ما تيسر و يترك ما يتعسر .
المهم هالتوقيع ما هو داخل مزاجي .
و من البارح و انا داج في النت ادور توقيع
الطشه ما لقيت .
لا تفهموا يا اخوان ان اللطش سرقة افهموه انه غزو مثل قبل و جبد بالقوة يعني
طولة و شجاعة و فركة خشم .
و كمان انا لاحظت ان في اعتراض عالمي على توقيعي و خاصة خشم البعير العربي
الي في التوقيع .
و بما ان كل شي عربي صار مكروه عند العلوج عيال العلوج قررت اغير التوقيع .
لا تفكروا اني خايف منهم .
لكن انتم عارفين ان العمدة راعي سجات و مقانيص
و اخاف يسلطوا علي قمر صناعي يتابعني في البران و التلاع .
او يسجوني بصاروخ موجه و انتم عارفين العمر غالي .
و لو رحت تضيعون بدون عمدة
و كمان خايف انهم يصلحوا علي في مجلس الامن عقوبات دولية و انتم عارفين
اني ما اسمع طلبة في الرز و حليب المغاتير و اخاف كمان يقطعوا السن توب عن ما تهاب .
علشان كذا ودي اغير التوقيع تمشيا مع العولمة .
طبعا انا قلت العولمة علشان
تعرفوا ان عمدتكم يفهم في السياسة و القطب الاوحد و الشرق الاوسط الجديد
و الديمقراطية الامريكية و هالسوالف الجديدة .

المهم الي فيه خير ابغاه يصلح لي توقيع ما حصل ودي اغث فيه بوش .
و الي ما يقدر يصلح توقيع يحط لسانه في بطنه و لا يجي هنيا يتفلسف و يصلح نفسه
فاهم و هو ادلخ من الدلاخة نفسها .
المهم الي يصلح التوقيع لازم يبعد عن الطيور و البعارين و الجيوب .
ودي شي حديث
يليق بحويط انترناشيونال الثاني عشر .
و ينتبه لا يحط صورتي في التوقيع اخاف تحصل
فتنة للجنس الناعم يوم يشوفوني لانها بتكثر حالات الانتحار بينهن يا كافي البلا .
و كمان ينتبه لا يصلح لي توقيع مدلع و بنــــّاتي .
انا رجال بدوي و راعي علوم و معاني
و هبة ريح . يعني يحط دلال و معاميل و شبة نار و علوم رجال .
و لا يحط كوت و سوالف فاضية و جيوب مقربعة .
و كمان ما ابغى نظارة لانها توجع خشمي
يعني ابغى توقيع ما حصل .

و السلام ختام .

حويط الثاني عشر شخصيا