لا ترحميني ..!!

ياللي تحبيني من ابعيد لبعيد
..................... اما اقربي والا بلاش اتركيني

مليت افتش بالليالي عن العيد
..................... ماتت أمانييّ وشيّب حنيني

اطرد سراب اللال بين المواعيد
..................... مثل الهوى عجْزت تطولك يديني

صد وهجر من غير سبه وتجميد
..................... كنك شوي ... شوي تستنزفيني

كنك تعودني على البعد تعويد
..................... ما احتاج رحمه منك لا ترحميني

قلبي من الدنيا ملته التجاعيد
....................... اقدر اجابه واقعي صدقيني

عمر الغلا ماكان جمله وتفريد
..................... اما تجيني صدق أو لا تجيني

انا رجل دغري وماشي على السيد
..................... ومن طاح من عيني مهو ذنب عيني

اللي يبيني جيت له ماني ابعيد
..................... ومن لا يبيني ماجبرته يبـيني
ل الشاعر ابراهيم المشعان العنزي