أصغر ذنوبي ياوجيه الخطايا
ماتنغمس في طهر قنديل الانوار
بس انها شقت ابكار الحنايا
واتنهدت برد الشتا عند الاسحار
جمرة ندم عضت عليها الشفايا
وعيون زاهد ترسم الزهد بالغار
هذي ذنوبي في اديني عرايا
من؟ يغفر ذنوبي الا صارن اكبار
عقارب الساعه تسم المنايا
وتيتمت كل الاماني والافكار
وش غثرب الميه بدلو النوايا؟
وش فرعن البسمه على وجه الازهار؟
ما ظن تصفالي قلوب البرايا
ولا ظن ترحمني صواديف الاقدار
ما شفت لي صورة بوجه المرايا
ولا قلطت قربان حبي لعشتار
فرحه ادورها بصدر الزوايا
تغزل نسيج الحزن وتكظ الغبار
إذنوب اولها معاك ومعايا
واليوم اصارحها ولا تقبل اعذار
طعم الذنوب اللي يذوب بحشايا
طعم الجفاف بحلق مصفر الاقفار
وظلن ليال التيه يمشن ورايا
وهزن جذع وتساقط التيه مشوار
وتفنجلت عين السهر من بكايا
وحناجر التوبه خناجر لها ثار
ياليت غايات(ن) تبدل بغايا
وليت الكباير تنقلب عني اصغار
الليل يحزن والثريا عزايا
واعصاب وقتي تحتريني على نار
تجتاحني آهات حزني شظايا
والآه تبكي وترقص دموع الاوتار
مثلي وقف من حيث تبدا البدايا
الألف ميل ورحلة الحزن تندار
احزان تقرع كوسها من ظمايا
ويتلني عرق العطش ليل ونهار
امن الظما جفت عروق الخلايا
ومدن يديهن واشربن كاس الامرار
يمكن ورى بكره تبان الخفايا
اسج الخطاوي وادهل ديار وديار
هذي ذنوب(ن) عابسات الحجايا
وهذي ذنوب(ن) ما تغسلها الامطار
يالله لا تجعل لذنبي بقايا
المغفره يارب وجناح الستار
اصغر ذنوبي يا وجيه الخطايا
العرض العادي
