ماتباطيت القصيد!!إلا تباطيتك
والشعر في جيتك شكل وطعم ثاني
عانك اقبلت ولمحتك في شطر بيتك
(فكره مجنونه تسلى بضيقة اوزاني)
يا أعذب أحساس ملكني علك وليتك
تفهم الشعر ان شربك بصحة لساني
يعلم الله في غيابك ما تناسيتك
بس في مره نويت انساك ممداني
قلت:ابنسى وارتفع صوتك ولبيتك
واثر خفاقي بصوتك عنك ناداني
ويش اسوي دامني بالجوف ربيتك
طفل تسوى هالحياه بعين: شرياني
تلعب..وتكبر..وتكبر.. لين عديتك
بالغلا (آخر نماي) وكل (شيباني)
والله ان عمري بدا من يوم حبيتك
واعرف انه ينتهي لو قلت: تنساني
حط في بالك أنا من عام خبيتك
ان صحيت بخافقي وان نمت بأجفاني
مابي غيري يلمحك حتى لا غنيتك
غرت من صوت الصدى لا ردد ألحاني
من كثر ما أشتقت لطيوفك تمنيتك
رمش عيني أو تصير الشوف لأعياني
وان تمادى هالحنين بجفني ضميتك
وقتها : ألقاك ..لكن ليه ما ألقاني ؟
والله انك من لفيت بنبضي حييتك
وكني بقولة (هلا) بينت حرماني !
هذا حالي يالغلا من يوم خليتك
وانت طمني علي فالبعد وش جاني ؟
اذكر اني بالوفا صغتك وسميتك
واذكر انك بالوفا كنت تحداني
وصرت أشكك كلامك لين بكيتك
وقلت:موعدنا يجي كان الله أحياني
ويوم جيت بخافقي وبخافقك جيتك
كنت انا رابح مع اني خاسر رهاني
والأكيد اني لقلبي بيدي وديتك
وعاد شوف اليوم وين الحب وداني
ياعساني صدق ولعتك و هميتك
و ياعساك بجد تعشقني وتهواني
ولو تقول اني بغيابي عنك عنيتك
أنت همك صرت أعده (حسبة أخواني)
الشاعر / محمد جار الله السهلي
والله إن عُمري بدا من يومَ .. حبيتك !!
رد: والله إن عُمري بدا من يومَ .. حبيتك !!
العرض العادي
