الضيقة اللي دايما تالي عصيـــــــــر
وش حيلتي واردها لا تجينــي
لا طل ظل العود حزة عشا الطيـــــر
كنها على سجن الحديد تحديني
يضيق صدري كل ما جات واسير
ولا يخفف سوج رجلي حنيني
لا حولنا مشراف ولا أقدر اطيــــــر
يالله قسمة خير لا تبتلينـــــــــي
وعقارب الساعه توقف عن السير
ولكن في الدوحة سواتي حزيني
والعبرة اللي تاصل الحلق وتحيـــــر
يا قربها لو قيل لي يا عوينـــــي
أمل شوف الناس ورد ومصاديـــــر
واللي يقول وش فيك كنه يهجيني
يعني على ما قيل ما باب تصويــــر
لا أحدن ابي قربه ولا حدن يبيني
اروح أدور خط ما به دواويـــــــــر
وادور اللي هادها تهتدينــــــــي
واخذ مع الهاجوس سجه وتفكيـــــر
واراجع اللي فات بيني وبينــي
واحسب ذنوبي وادور لتكفيــــــــر
عساي ما قصرت في والدينــي
وعساي ما قارنت من ينفخ الكيـــر
واللي يحمل المسك جعله قريني
ويطري علي يوم الحشر واطلب مجير
ما أعطى كتابي في شقيقة يميني
ويطري علي صدقان كثر الدنانير
اللي تعاديني إذا كثر دينـــــــي
وراعي الهروج اللي سواة المناشير
أصد عنه وأدري أنه يعنينــــــــي
الله حسيبه يوم عرض القواريـــــر
والله حسيبي من صواب مكينــــي
والا طرأ لي واحد كأنه صغــــــير
أما اصغر بيومين والا سنينــــــي
عرفت وش قومي وعينت تفســـير
للضيقة اللي من زمن تعترينــــي
حبه في صدري سالفة حب في بير
وكأن الفؤاد يقول هذا زبينــــــــي
اشفق على علم يجي من من ضيـر
ولا يسمع اللي سولفوبه ونينـــــي
يا كثرهم غيره ولكن خبر خـــــير
ما غير شوفه في الوجود يهنينــي
رأي كذا يا عاشقين الغناديــــــــــر
ماله على وجه البسيطة وزينــــي
العام اجيه من حساب المساييــــــر
واليوم حال عداه وينه ووينـــــــي
خطاي تعليق الأمل في المدابيـــــر
الين راح وشفت حقري بعينــــــي
صبراً جميل وخابراً أنها مقاديـــــر
والله على تخفيف حزني عوينــــي
ذي حالتي لين تغبى الشمس و اصير
معطن سراحي عقب ما ني سجيني
والا امتلئ جوف الشجر بالعصافــير
طلبت من رب العباد يهدينـــــــــي
يعتقني المذن عقب ضيقة عصيـــــر
اللي على سجن الفراق تحدينــــــي
الضيقة اللي دايما تالي عصيـــــــــر
العرض العادي
