ابو مناكب حولها الريش مصفوف () كنها رفارف جمس موديل 70

يابو محمد ما ورى الخوف اي خوف
حنا ترانا مثل ابونا امقفيّن

الجيب لو انه من اسنين مكروف
بدّل مياجره ابتواير بوالين

نبي الحماد اللي به القلب مشغوف
لي كم سنه ياخوك ماشافته عين

لاتلبس الفروه ولا الشال ابو صوف
شبّ الحطب واركد عليه الرسالين


واتعب على فنجال ماهوب موصوف
يبعدك عن كل الرجال الرديين

لاجا الصباح بريحة البر محفوف
دفي المكينه وشيّك الفلّ بنزين

والاشقر اللي من نهارين معلوف
الجوع في ثندوّته يا ولد شين

الفارق اللي في مواصيفه اوصوف
صعوط ٍ أمهبّل فوق راسه شياطين

ابو مناكب حولها الريش مصفوف
كنها رفارف جمس موديل 70

ابو كفوف افعالها من إكلشن كوف
وراسه تقل كشاف يوكن إبهدين

جنحانه اسيوف ٍ تبارز له اسيوف
وارضيته كنها عروش السلاطين


وابطون جنحانه مهافيف هفهوف
ومناخره مناخر أخيول حطين


عليه بشت الشمس ضافي وملفوف
وسبلة سراويله اشعور المزايين

مدري شعر اريام ولا شعر نوف
فلن شعرهن واجمعنه من اللين

وسرعة هداده كنها سرعة الشوف
يجيب صيد ٍ ما تجيه الشياهين


واللي روابيجه كبار ٍ من الجوف
ريش الحباري والقطا والكراوين

كنه عقاب الصيريمي يوم ملهوف
وكنه ابو خوذه امعشي البعيدين