قصيدة الشاعر مصلح براك الحربي في الحويطات 00

قصيدة مصلح بن براك المحمدي الحربي في مدح الحويطات 00



[poem=font=",6,blue,normal,normal" bkcolor="transparent" bkimage="" border="none,4," type=1 line=1 align=center use=ex num="0,black""]
يارافع السبع الشداد العظيمات=ياباسط ٍ من تحتهن سبع اراضين
والعرش والكرسي عليهن منيفات=يامنزل الاسرا والاعراف والتين
بامرك حضرنا من بعيد المسافات=جينا نتشرف بالرجال الشريفين
سلام من حربي لكم يالحويطات=ياهل الكرم والسيف أول وهالحين
أفعالكم ماهن علينا خفيات=يشهد بها القاصين قبل القريبين
لكم بتاريخ الجزيره بطولات=من مملكتنا لين مصر وفلسطين
ياما لكم في ماضي الوقت غارات=عدوكم يشكي عواقيبها سنين
يوم ان ابو تايه يقود الاصيلات=بيارقه تكفخ من يسار ويمين
وابو طقيقه طق بالروس طقات=طقة شيوخ القوم في ذمته دين
يطقهم طق النياق الغريبات=لاوردت الجربا لحوض البعارين
ويقول ربعه بالمبارك منيخات=ماذيروها بالرصاص المعادين
يامقلطين الضيف فوق السمينات=رجالكم يكرم ولو ماملك شين
وانسابكم في شجرة العز جزلات=شجره تظلل من تحتها بساتين
ماهي سوالف ليل ولا دعايات=علم ٍ عليه من المؤرخ براهين
عليه بالمعجم تواريخ واثبات=وعما ذكرته كل الاجواد دارين
يشهد عليه الله وصدق الروايات=في شجرة الاشراف عزه وتمكين
حويط ابن جماز راعي الطويلات=شريف نسل اشراف من شجرة حسين
وش عاد نحصي من رجال المروات=للطيب طيب وبالمعارك مجانين
يابو طقيقه يازبون العسيرات=يامزبن الي من عنا البعد ناصين
تنحر لهم عوج المطايا جزيلات=مع دلة ٍ تجلى هموم الحزينين
جدك طرد باشات الاتراك زافات=جوكم سلاطين ٍ وراحوا مساكين
ورثت طيب الجد في كل مافات=سجلت بالتاريخ جملة عناوين
على يدينك يصغرن الكبيرات=وفي حكمتك يركد شعاف الشياطين
نرفع لك البيضا بروس الطويلات=ياراعي البيضا على العسر واللين
نرفع لربعك في سما المجد رايات=بيض بثلاث قلوب ووجيه ويدين
ونرفع يدينا فوق لله بدعوات=نرجيه يرحم من رحل قولوا امين
يالله عساه بجنة الخلد مامات=في جنة الفردوس بين الرياحين
ذويه يقصر دونهم قاف الابيات=لأنهم مضرب مثل فالقوانيــن
في فعلهم صاروا مثل بالسماحات=سمحين ياحويطات والله سمحين
مضرب مثل للمرجله والشهامات=خليتم الدنيا وفضلتم الدين
والآن معكم بالمكارم شهادات=إعتاق مسلم زي عتق الملايين
حديث باسناده صحيح الروايات=ياحظكم باعتاق كل المسلمين
بكره بفعلتكم تذيع المحطات=تفخر بها العربان حضر وبداوين
والفضل بعد الله لراع المهمات=لبو طقيقه ثم لابن الكريمين
الغانمي ذيبان جزل العطيات=من ساس حرب الي على الضد قاسين
حرب الدول ماهيب حرب الدويلات=دفانة الركبه بوسط الميادين
ضاري على زم الحمول الثقيلات=يشيلهن بالحال ماقال بعدين
ولكم من الحربي سلام وتحيات=ياعلكم دايم على العز باقين
تحية ٍ تشمخ على روس ابانات=واثقل على الميزان من طور سينين
والله لو أنظم بيوتي ألافات=ماتوفي احقوق الرجال الوفيين
لو افتح بديوان الاشعار صفحات=أفعالكم ماتحتويها الدواوين
وصلوا على خاتم جميع الرسالات=محمد المختار خير النبيين
اعداد مايقرى من حروف الايات=واعداد ماحجو لمكه ملبين
[/poem]