يا مل قلب ٍ تطربه ريحة الشيح
على زمان ٍ قدّم الطيب وانزاح
من جاد حظه نال طيب وتماديح
ومن بار حظه عذربوا فيه ثم طاح
واقع نعيشه بين هم ٍ وتجريح
ولا به أحد من تالي الوقت مرتاح
لا وآهنا اللي مسعد البال ومريح
اللي يذوق النوم وايامه املاح
ضاقت علي افجوجها والصحاصيح
امسي وحيد وساكن ابديرة اشباح
شبيت في ليل السهارى مصابيح
وفريت افكاري كما فرّ مسباح
كني ظماوي يمشي الدرب ويطيح
الموج جرفني على خمسة الواح
يا طير يلي ما تعرف الملاويح
لا توحي التعلوم لا صرت ذباح
جثل الثنادي والمخالب طواريح
عريض كف ولبرق الريش بطاح
صيدك من الجزلات مع فجّة الضيح
ماهيب صفّة ريش في راس ملواح
لطّم حطّام ٍ بذيك المراويح
بالجو لحّاق ٍ وبالقاع نطّاح
تخمهن خم السيوف الذوابيح
واتخضب الكفين والدم منساح
ابيض نحر يشّبح الكف تشبيح
عليه بشت الثلج مدقوق بوشاح
عينه جمر يوّضح الشوف توضيح
رادار للمبعد كما البرق لا لاح
لا هد أخذ هالربد من عقب تمريح
ضافي شليل امسرول الساق جراح
حوّاش عمّاش ٍ بعيد المشاويح
ومن كثر ماحبه مسميه درداح
يا زين هده عقب رش المراويح
في خايع ٍ للصيد ما جاه طرّاح
فرخ ٍ عديم ولا يعرف التباريح
اللي مشاويله تقل نار واسلاح
ياطير شفني طاوي البيد والريح
اسري مع النجمات والهم سراح
أسآهر ادلالي و اردّ المفاويح
عل ّ الدلال اتفوح والبال ينساح
الهيل والمسمار فوق مطافيح
كيف ٍ جديد ٍ ما حلى الكيف لا فاح
في ليلة ٍ فيها النجوم المدابيح
في قفرة ٍ تسمع بها الذيب لاجاح
اخميعة ٍ عندي تساوي مفاطيح
وشوية ٍ للصيد ماتبرح ابراح
اخير من شوفة عيال ٍ مشافيح
قطاعة الارحام يا جعلها الماح
قلّابة النيّات شرّابة القيح
أكاّلة الميّت مناكيف واشحاح
اللي لهم عند اهل البشوت تصريح
اكلاب سفره تنهش العظم لا طاح
بعض الرجال اليا غشته الزحازيح
تلقاه لبشوت الهوامير نبّاح
ماله ورى الاجواد غير المصاليح
عبّاد مال ٍ ينفض الجيب فضّاح
يشيل نفسه كنه الفيل ميطيح
ماكل حرام ويحلب الثور سفاح
للدود جعله والعفن والملافيح
تذري على قبره عواصير وارياح
يا صاحبي دنياك ركلات ترجيح
نوب ٍ تجي بالقول نوب ٍ مع الساح
دنيا غدت فيها الرجال الطحاطيح
ولا عاد فيها للرياجيل مرواح
دنيا جزت بالذل ناس ٍ مفاليح
وعزت سرابيت ابملاين وارباح
اللآش لو يملك بنوك ومفاتيح
حافي قدم تلقاه للعيب شقّاح
والناس تبع الجيب مثل النوابيح
للدبش سراح ٍ وللغرس فلاح
المال ما عزّ العيال السواميح
والمال يفنى وسيحة البال الافراح
اكذب دموع ٍ هي دموع التماسيح
وانا دموعي اهموم وآهات واجراح
اضحك واجامل لودموعي مسافيح
واكتم وجع قلبي سكاكين وارماح
من خوف لا يدرون ناس ٍ مفاضيح
تصبح همومي عندهم عيد وافراح
يا ما رياجيل ٍ على هبّة الريح
راحوا وطي بالقاع فرتاح ياصاااح
ماكل رجل ٍ تحسبونه شليويح
العيب بالرجال لا زاد ما راح
هذا الزمان اللي يقولون يا ويح
مذكور بالقران واسناد الاصحاح
ما عاد للعطار حيلة وتصليح
على فساد الدهر ميفيد الاصلاح
وماهوب انا المجروح كلنا مجاريح
شوف السنين اللي على الناس تجتاح
اصبر على ضيم الليالي ولا بيح
ترى الفرج دايم له الصبر مفتاح
لوتلتهب كل الجروح المفاديح
عندي لها كيّه واذا طبت برتاااااااح
عناد الرواد
يا طير
العرض العادي
