أقسى القلوب اللي برجلك اذا دسته

الله من نقص ٍ بديني تحسسته
والدين قبل النفس والروح والمالي

احد ٍ رماه الجهل والنعمه إرفسته
وإحد ٍ بكى دينه على ذيك الاطلالي

واحد ٍ رفاق السوء بالعيب نجسته
واصبح عديم احساس في قلبه الخالي

أقسى القلوب اللي برجلك اذا دسته
عادي كأنه شايف ٍ واحد ٍ غالي

تاخذه عزت اثمه اذنوب طامسته
ما يسجد إلمولاه يا جعله الصالي

ماكل حرام ودنيته حيل نكسته
لو عنده الاموال وبيوت وعيالي

داله على وجهه والحبوب يبسته
كنه محنط مومياء ٍ وتمثالي

لو تسأله بركان الاسلام هالسته؟
يقول انا مدري ومسلم بالاقوالي

شيطان انس وتلحس المخ هلوسته
على الحديده عاش والوضع بطالي

مدام شهوات البشر صدق خيسته
ماله معي مصلوح ولا يجلس اقبالي

وعيب ٍ عليَ ان كان في يوم جالسته
وعيب ٍ علي ان جيت لو دونه ارجالي

ارقام لو جمّعتها لصبحت ليسته
ودي أكنسل لين يرتاح جوالي

كم اتصال ٍ قد وردلي ولا دسته
إكفات شر ٍ من خطا القيل والقالي

وكم إرخمه جاني بخده ولا بسته
ما هو تكبر مير حاجات في بالي

وكم واحد ٍ ينصح والعيوب لابسته
نفس المسلسل بس ينعاد طوالي

الثوب قبل اشريه لا شك قايسته
أخاف تطلع لي يد الثوب بنطالي

وابليس ماليبه ولا بحال وسوسته
ولا له علي اليوم يا صاحبي والي

والخوف هذا بعد الايمان موجسته
بعد الضياع وتيهتي بشهب اللآلي

عطر السعاده مع صباحي تنفسته
لني بذمة الله وامريح ٍ بالي