دقات قلب

دقات قلب البوصله والعقارب
واقع خيالي بس ماهو خُرافه

خلك معي معليش لو به تضارب
من حول انباء الدجل والسخافه

هنا على أنقاذ صمت المُحارب
أموت واشبع موت عمري واعافه

ما قلت ابكتب شعر لجل التجارب
ولا عشان الجمهره والاضافه

ولا جيت اقول ان المشارق مغارب
شاعرك اطلس والخرايط غلافه

اكبر دليل اني من الصف هارب
من زود ما فيني علوم وثقافه

محتجت تعليم ٍ بوجه الغثارب
لا لا ولا فكرت وقتي اخافه

سطحيتي ماعد شعري واضارب
بالسوق الاسود او كلام الصحافه

أنا هوس شعري يباعد يقارب
يبطل تيمم من توضّا بقافه

الملعبه نهري والمشاعر قوارب
ومن اجل قطرة شعر تكرم ضفافه

مرّات اشطح له الى سد مآرب
ومرّات اردّه للصغار الهجافه

يلعب معي شطرنج ولى يحارب؟
كششش كش ملك ما عاد والوقت طافه

غمايتك تشبه لقطع الكهارب
مدري غبى ولا تكلف كلافه

وش انت يا صعلوك بين المسارب
يا راس مال المهزله واللقافه

وآدن دن دن دن والوجه غارب
لو كنت ليّن علموك الجلافه

من كثر ما فيني طموح ومئآرب
أسّست حزب الشعر قبل إئتلافه

يا هووه تنس الطاوله والمضارب
كيف ومتى من وين جاك احترافه

لو كان ردّ الروح قبض الشوارب
كان الطعن بالظهر ما قيل آفه

صحيح من قال الاقارب عقارب
عزالله انه ما هدم حظ شافه

الشارب اللي ما يدسّمه شارب
ماله وقار ولا عليه الحسافه

ومن لا شرب من عد صاف المشارب
يشرب غثابير الزمان وجفافه

سرعة وصول الضوء سطح التجارب
تعطيك ناتج بُعدنا بالمسافه

وآمد يدي وأطلب الرب يا رب
انك اتجنبني زمان السخافه