من قصيد الجد المرحوم فالح الرواد

البارحه والعين قطّر صميلها
مثل الغشين اللي همل من مخيلها

تسهر طويل الليل ما ذاقت الكرى
والناس حولي هاجعه في مقيلها

النفس زِعله كادها الهم والعنا
ودارت دواليب الشقى في سبيلها

محد ٍ نجا من ضيم بقعه وجورها
حتى الرضيع اهموم بقهع يشيلها

ان اقبلت يوم ٍ فلا بد تقتفي
ايامها الفرحه سريع ٍ رحيلها

نشدت كل الناس عن خافي السبب
والكل منهم عاميا ً عن دليلها

صبرت حتى ما بغى الصبر صحبتي
حتى كنين النفس بيّح غليلها

اسهر مع النجمات والضو والقمر
واسري مع السرحان في غب ليلها

انادم اهجيني وسيفي وبندقي
ولا قبلها نادمت راعي جديلها

اشكي على سيفي ويفهم لشكوتي
واسند على الله ثم ساطي صقيلها

وان اقبلت من ريب الايام كربة ٍ
ازبن على ربي وحالي يديلها

ازبن على اللي عنده الضر والنفع
اللي لعسرات الليالي يزيلها

يا سامع ٍ قيلي تفّهم وصيتي
وصية ٍ بيني وبينك جميلها
ما يضمن الانسان عمره من الفنا
وطبع الليالي كل منا جهيلها

والعاقل اللي حدّ نفسه عن الخطا
وحاسب عليها قبل تاصل كفيلها

ومن لا تعب ع الجود بوّل مشبته
تذهب حياته ما يحصّل حصيلها

ومن لا رقا راس الطويله ونافها
يعيش عمره وسط مجراف سيلها

ومن لا حمى عرضه وصانه عن الردى
وردوا على حوضه وشربوا خظيلها

ومن يبخل بماله عن الضيف والخوي
يعيش بين الناس ارذل رذيلها

المال عندك يبن آدم وديعة ٍ
من النار ما نجت مصاري بخيلها

ومن لا هرج بالصدق ما يكسب الثنا
والصدق ميزان المراجل وكيلها

الصدق مقياسه على القول والفعل
ولى المراجل قول يتلى فعيلها

وفي حاجة الانذال تجرع مرارة ٍ
وتاطى على نار ٍ وحامي مليلها

ومن رافق الطيّب كسب من طبايعه
ومن قارب الجربان يصبح مثيلها

ومن لاصبر ع الكود ما نال حاجة ٍ
وجته اليالي السود تهذل هذيلها

ومن ذاق طعم الحب لابد يشتكي
ويشوف عدلات الليالي وميلها

من دور عنتر والملوّح وعصرهم
ورقا المحبه ما توقّف هديلها

حتى العواجي بيّح الشوق واشتكى
وياشوق روح ٍ راح عنها خليلها

والعمر لو طالت لياليه ينتهي
ومن قدمّ الجزله يلاقي جزيلها

وازكى صلاة ٍ عد ما لاح بارق ٍ
على النبي مالشمس شعشع شعيلها