راسي ثقيل

الشعر أباثلثه والوزن اباقوسه
وآجمّعه في مربع او شبه مستطيل

في بعض الاحيان اطبّق حالة الهلوسه
وفي بعض الاحيان اطبّق حكمة المستحيل

في طاسة الراس داره تبعث الهسهسه
وانا معاها عقيم احساس راسي ثقيل

صحيح اني إبدوي ماني رجل هندسه
لكن اهندس حروف الشعر لحلا جديل

ما باقي الا الفقر والجوع والغطرسه
في وجهي اللي اشوفه فوق هام النخيل

من حزن عُمق البحار وجرّة النورسه
ما كني الا شتات انسان حاله هزيل

من دمع احسّه سواد الليل قد نكّسه
مثل البيارق تنكس . شي ما هو قليل

يعزّ والله عليّ الجرح قبل المسه
وآصد دمعي بصبري أو اردّه قتيل

اعوذ بالله من شيطانة الوسوسه
اتفل عليها قبل قلبي عليها يميل

واكتم جراحي بضحكاتي ولا احسسه
هو ليه اجرح شعوره دام طبعه نبيل

اغيب واحضر واسوق العذر وآ ونسه
واليا التمس لي عذر حظي رزين وجميل

واهيم في عالم الازهار من نرجسه
واقطف رياحين حبه واشربه سلسبيل

ياعبقر الحسن والديباج يا سندسه
يا كاس ديهاق ذاب بسكره زنجبيل

خايف على حبه المجنون لا ادنسه
اشبك ادينه بديني والهوى له كفيل

اذا كان خلك عسل يا هووه لا تلحسه
كله / وخله معك باقي لوقت ٍ طويل

وان كان مابه مجال الورد لتمكسه
خل الورود الحُمر تذبل ودمعي يسيل