الحياه الزوجيه

يالمبتلي مثلي من اسنين متعوس
يوم ٍ دخلنا هالقفص حالنا حال


قالوا الزواج ايهدي اقلوب وانفوس
قفص ذهب ,ترتاح, ويجيلك اعيال


والواقع الواقع يقولون معكوس
لا صارت الجيزه جنازير واغلال


ماهوب حالة واحد ٍ عاش مهووس
يغازل الحلوات و يوسع البال


اللي حبيبه جالس ايبخه افلوس
ومطلع ٍ له رنج ومعطيه جوال


مغنيه حبه عن هوى كل ماموس
مرضيه والنعمه من ايمين واشمال


شبعان يحليله من الكيك والجوس
وتذاكره لندن وباريس وايطال


لبيه لبى الطول والردف متروس
والموت في عينه على كل الاحوال


ارخص عطوراته من اديور او بوس
والبوك فيه اربع بطايق يرجال


شيكات بالشنطه وهبّات ناموس
يعني اميره بس من لبسة الشال


والرمش لا والله ولا رمش طاوووس
امسكّت وعنده اساليب تغتال


يسرق قلوب الخلق وينزل الروس
لنّه رقم واحد حرامي ومحتال


لا عاد تفتيني وانا ماخذ ادروس
علاقات فالمشمش يبو حبّة الخال


عيني عليهم بارده والهوى كوس
يواعده يوم انت تبكي على اطلال


مسكين تمطخ من حويليب ابوقوس
ومقابل ٍ حرمه تقل وجه رجّال


لزعلتها حفتلك الشارب ابموس
ولرضيتها ترضا بخاتم وسلسال


والبيت يا ويلي على البيت معفوس
والمطبخ امعفن به الوان واشكال


بطاطس اعماني على صوص دقوس
وتشرب عصير العين عصير ابو ريال


لتفسر احلامك اذا شفت كابوس
ولتنام في وسط المقابر والادغال


هذي حياتك وانت بالحيل منحوووس
اهدى ونام وسّع الصدر والبال