ميك ومساحيق

[poem=font=",6,blue,normal,normal" bkcolor="transparent" bkimage="" border="none,4," type=1 line=1 align=center use=ex num="0,black""]
يامل قلب ٍ من جفا صاحبه ضاق=أبطا عليه وصار من ضيق في ضيق
الدمع من عيني على الخد دفّاق=عيا يكف وغرّق العين تغريق
كني مريض ٍ فاقد الوعي مافاق=يغمى عليه وياخذ شوي ويفيق
باسباب خل ٍ حط بالقلب معلاق=وانشب غلاه وعلق الود تعليق
عليه قلبي لا ادمس الليل خفّاق=حيث ان حبه حرّق القلب تحريق
الصاحب الي غيره اليوم مالاق=ولاظنتي يطري على القلب ويليق
غرو ٍ غرير ٍ كامل الوصف ودقاق=ماله شبيه ٍ بين كل المخاليق
أم الثمان البيض والريق ترياق=يامحلا من ريقها فكة الريق
خفيف دم وراعي مزوح واخلاق=يظفي على هرجه من الضحك تشويق
اليا هرج هرجه ترانيم عشاق=واليا ضحك تهتز كل المعاليق
كنه خرير الما ليا جاك رقراق=متحدر ٍ من فوق وقت المشاريق
الخد كنه لاعج ٍ فيه برّاق=يجذب سنا ضوه قلوب المشافيق
ريانة ٍ مبرومة الفخذ والساق=عمهوجة ٍ لوّع غلاها العشاشيق
الله عطاها يوم تقسيم الارزاق=فيها وصوف الحسن جمله وتفريق
وانا اشهد ان الحسن في صاحبي فاق=أمّة حلى من دون ميك ومساحيق
مصيونة ٍ مادوّجت وسط الاسواق=ولاهي من الي يعرفوها السواويق
ماهي من الي رقّمت كل سواق=ولاهي من الي يتبعوها المطافيق
جاني واخذ مني على الود ميثاق=وثبّت غلاه اوّثّق الود توثيق
لاواعذابي كان لمفارقي طاق=وانا ولو لحظات فرقاه ماطيق
أحس في قربه على الصدر دقاق=سلمت له روحي ومن غير تعليق
واكتب بدم القلب في بيض الاوراق=واخذ على نفسي عهود ومواثيق
إني لصونه واحفظه بين الاعماق=حتى يصير ارسى من اللوز وطويق
حب ٍ صحيح ولابها كذب ونفاق=توفيق من ربي وكل شي توفيق
[/poem]