ياعناد لو حاربت انا الجن والناس=وتوحدت ضـدي بعـاد وقرايـب
ولو الزمن جرعني المر بالكـاس=وقامت لي الدنيا تكيـل المصايـب
لنطح بصدري يافتى كل هوجـاس=وبالكف اخوض غمارها والحريب
ولاني من الي يتقي شر الانجـاس=في صمت ويعـود ذليـل وخايـب
وعمري بيد اللي خلق كل الاجناس=ولابد من يـوم تحـط النصايـب
وماني كما اللي لاغدا ليله ادماس=الـى بغـى لـه نيـة رد هايـب
قليل عرف اليا اظلم الليل يحتـاس=وضاقت عليه الواسعات الرحايـب
كب الذ ماهو على الدرب بجـاس=بلوى رفيق وزاد حمـل الركايـب
واوصيك باللي خوته ترفع الراس=يمضي ولو كانت جروحه عطايب
لاهد له كف تقـل كـف قرنـاس=مرباه مابيـن الفضـا والهبايـب
وليا نخيته عالخطر لامشـى داس=واذا استشرته يعطي الراي صايب
ويو المصايب كلمته دوم لابـاس=وينطح من جنود الليالـي كتايـب
ويقدم الى من الخطر دق الاجراس=عزام باليمنى يعسـف الصعايـب
مايخون بالعشره ولاهوب بـلاس=وما يدق باب الجار والجار غايب
عن عورة الجيران بعيونه نعـاس=ويغضي حيا عن ناقضات الذوايب
يبعد عن المنقود وافي وحسـاس=وفي واجبه موجود ماهوب غايب
لو كان بالدنيا على حد الافـلاس=ورزقه كما سرحان غصب ونهايب
كفه كما مزن نشا عقب نسنـاس=يروي ظما قاع هشيمـه حطايـب
ولو الردي ماله كثر رمل الاطعاس=خلـه يعلـه للفنـا والذهـايـب
ياعناد هذي لك وصيـه ونبـراس=ومن شب كان الموت خلاه شايب
وافطن ترا مافيه للجـود مقيـاس=وكل بما عنـده اذا طـاب طايـب