يا طالبي تفصيل عن واقع الحال = ماني بكاتب شي كلّن درى به
و كلام ما هو لأي مخلوق ينقال = أكيد ما هو صالحٍ للكتابة
لو كان حق و ثابتٍ ما به جدال = بعض الحقوق يضيع ما ينحكى به
العدل في ميزانه خفاف و ثقال = يعني كذا بالضبط قانون غابة
و أن حاكموا بعض التوابع و الأذيال = محدن يقرب من زعيم العصابة
يِمدح و تِضرب في نزاهتْه الأمثال = و يلقى لتغيير الزلابة زلابة
و يدرِّب الطاقم على نهب الأموال = مثل القنوص اللي يدرِّب كلابه
و من ياصله و يصير خادم و مرسال = ينقال له راع الذكا و الذرابة
سرب النحل يرعى الزبالة و الأوحال = و إن جا عسلها مالحٍ لا غرابة
حظ العرب من بد كل البشر مال = وش حيلتك لا كشَّر الحظ نابه
حالي كذا لا صرت تنشد عن الحال = ما ينكتب لو كان كلّن درى به