لومشينا مصر واصوان الجنوب=ولوعلى السودان شدينا الركاب
الوناسه ماتجي برحلة قروب=ولاتجي بخوة رديين الجناب
الوناسه يوم نركب بالجيوب= واتجاه البوصله نقطة ذهاب
وعند ابورائف وقوفك هو وجوب=القويشم والنعم نسل الذئاب
لاعتلى المرقاب من قبل الغروب=حامل ال16 وحزام وزهاب
الشلايا لانظرهن بالدروب=حط عنهن كان يعفي للثواب
لاسمعنا رميها جبنا العروب=والهشيم شمام جابوه الشباب
والوعول مرّكده في كل صوب=هذا يصلخ وآخر يسن الحراب
وهذا سوى دلةِ تبري العطوب=ولقم الشاهي بزعتر من غراب
في شعيب ِ يافهد يبري القلوب=والسهر بين الرتم طب المصاب
زين نومك لاغدا جسمك تعوب=وزين قومك والسما ظلما سحاب
واذن المذن وصلينا الوجوب=ثم شكرنا ربنا منشي الحقاب
وردت النومه ترى فيها عيوب=تلحق النايم من اصحابه عتاب
لاطرى ذيب الخلا زين الصحوب=مفلح اللي غصب لانت له رقاب
الزعيم اللي على العليا يجوب=مسندك في وقت به مخلب وناب
رحلةِمع غيرهم ماهي طروب=هذا ذيب وصاحبه مثل العقاب
رفقة رجالِ ولانقنا الكذوب=والحسود يموت مشقوق الثياب