بحط قوقل وابحث بصفحة الويب
باشوف لي موضوع يطرد غمومي
انا وضيفي وصاحبي يالمحاديب
مثلث ابعاده يزيد الخصومي
أوصيت ابن عدوان ظنيت به طيب
يا مار كسّر بالمهايط عزومي
اقول له يا شيخ يا قرم يا ذيب
ويقول ازهل واحتزم للنجومي
انا اشهد انه ترّب الوجه تتريب
يا جعله الماحي وريح السمومي
لا والله اني لنقله نقل تأديب
وتجيك يالمري طناخة علومي
بعض العرب جنّب عن الطيب تجنيب
حتى لو ان بواجبه ما يقومي
كنه فشق بارد ورميه مكاذيب
ولا ينفع الصياد وقت اللزومي
لو كل من جيته يعرف المواجيب
ما شفت بالدنيا رجال ٍ رخومي
انا اشهد انك يالبحيحي على طيب
وامن الرجال اللي تعرف السلومي
سيماك حر ٍ ماكره بالمراقيب
خطو اشقر ٍ وافي طويل الكمومي
اقطم طويل ٍ عاتقه للمقاضيب
اجدل حدب عينه مصاليب رومي
اللي سراويله بساقه جلابيب
رويان ريشه من براد الحزومي
عليه بشت الشمس لا هد ميخيب
لا عيّن اهدافه يشنّ الهجومي
سداح يطويها بعكف المخاليب
واليا كفخ يرقى بروس الرجومي
جودي وحش يصوّب الخرب تصويب
من طرح فارس لبسوه الختومي
ضافي شليل يعذّب القلب تعذيب
لا شافه الشراي ما هو يسومي
اشريه بونصات الذهب ما بها ريب
الدفع كاش ولا يجي منك لومي
لك شيخة ٍ تكرم عن الكذب والعيب
ما هيب شيخة بشت فوق الهدومي
استر على ما شفت وان رحت لتغيب
وامسح خطاه بلحيتي ع العمومي
والله ما تسوى بحق الاجانيب
واضيوفنا شيخان من روس قومي
ما هو عشاك الا عشاك المراويب
اللي شحمهن بالصياني يعومي
وادلال تطبخ يا حصان الاطاليب
فنجالهن يجلي كبار الهمومي
في مجلس اللي رتّب الهرج ترتيب
اللي بوجه الضيف لازم يقومي
مجلس عمار ومدهل ٍ للاصاحيب
بابه مشرع للعرب والقرومي
تكفا يبن سالم تعود المعازيب
وانحر لشوفك هالسنام الردومي
كيبورديه / عتابيه
العرض العادي
