بيان من طلال العماش الفقير الى قبيلة الحويطات

مسيتم بالخير وصبحتم بالرضا يا عرب الحويطات كلن باسمه حلف ما حد يقوم وفكونا من العزائم تراني مهجول وكل يوم بديره عاجز عن الارتباط وعلوم القبائل من بداية هالسالفه وانا اتابع كتاباتكم وردودكم ولان بي طبع السودانيين تكاسلت اسوي لي ايميل كان اقلب هالاسامي الى بالمنتدى واختار اسم الشيخ طلال العماش واقرأ عليه المعوذات وهو يفتح معي مثل سالفة مغارة علي بابا الشاهد بالموضوع اني ماني صاحب الاسم لكن هي عبرة بالصدر غامت واستدامت وعندي كلام ودي اقوله وعلى رأي ورده اسمعووووووووووووني
1- ما كتب من الشيخ طلال العماش يمثل قناعة اخوانكم من قبيلة عنزة ونظرتهم بقبيلتكم العزيزة على قلوبنا ونظرتنا للحويطات انا ما نزود عليهم بشي يكرمون ضيف ويروون سيف وتربطنا بكم علاقات طيبه من قديم الزمان جوار وحلف ونسب
2- نايف الفقير الى تنسب له هذي المعمعه كلها ما اعرفه شخصيا لكن اسمع به وتكلمت بالموضوع مع قريب له واخبرني هذا القريب انه تكلم معه وحلف له ان الكتابه المنسوبه لاسمه عن الحويطات ما كانت له وانه بيسجل بمنتداكم هذا لكتابة ما يبري ساحته من المنسوب له ولاني معتذر عنه لكن حبيت احطكم بالصورة ان الرجل بكلام قريبه ينكر ما نسب على اسمه وانتم عارفين ان هذا انترنت ما هو محمي وكلن قادر يدخل باسم أي واحد ويكتب الى يبيه
3- لي عتب عليكم وهو عتب من محبه مثل هالامور ما تصير مثل نشر الغسيل على بلكونة بالدور العاشر كلن يشوفه معالجتها بالعقل والعاقل خصيم نفسه قلتوا ان شيوخكم متولين الموضوع ومن له كبير ما يبلش بأخذ حقه لو اني بوضعكم ما ارضى ممن كان ينتقص قبيلتي لكن حنا متعلمين وبعصر نحارب فيه الجاهلية الأولى بأفعالها حبيت ان شيوخكم او احد يمثلهم يعالج الموضوع بحكمه بانه ينسق مع الوجهاء بقبيلتنا بعيد عن القضوات والمطالبات والكلام الفاضي الى نشوفه بالمسلسلات البدويه وصارت جمعه وضيافه ويجيبون لكم نايف الفقير تسمعون منه وبكذا يطيح الحطب ونحافظ على الحب الى بين القبلتين ودام ان الشيخ طلال العماش تدخل بالامر هو كفو وقادر هو واخوه طلال ابو طقيقه ينفذون هالخطوه الى يكون لها صدى طيب حتى في الأجيال القادمه الى اشوف انهم جيل بلاستيشن والله ما لهم بالقبيلة بس هالخطوة محسوبه لجيلنا يمكن تكون بوابه للاجيال التاليه بتقوية الروابط بينها .
4- هالمثل يعجبني ( يا جبل ما يهزك ريح ) القصد منه هو كل من كتب بالانترنت تبون تجون من اقصاكم ليه ما تكون قافلتكم تسير ومن يكتبون كلاب تنبح بقافلتكم بعدين على رأي زكيه زكزك ( كشكشها ما تعرضهاش ) الجمره اذا ما حط عليها حطب تخمد وتصير رماد اذا كل من كتب رديتوا عليه بمنتداكم كذا انتم تعظمون الامر وتهولونه ويصير له انفجار قنبله وبدل ما تكون صفحه يطويها الزمان يكون لكم دور ان هالصفحه تصير مجلد كبروا العقل يا مالى وبعد حيي السفيه يحقر ما ينعطي وجه والرأي وبكيفكم ان اخذتوه والا خليتوه امسحوا من منتداكم كل شي عن هالموضوع بكذا نار وانطفت بمحلها قبل ما تنقلها المنتديات الثانية وبكذا تكونوا مصدرين للي يكتب عن قبيلتكم .
5- اعتذر طولت عليكم واعتذر منكم على سودانيتي بدخولي بالاسم لمنتداكم لو اني المره الجايه ناوي اختار اسم عاشق الدله عمسان وبي شف للقهوة واعتذر من صاحب الاسم لدخولي باسمه وعسى ما ازعجتكم بس
وتمسوا على خير